પશ્ચિમ બંગાળમાં સ્વતંત્રતાદિવસ પહેલાં ૩૦૪ જિલેટિન સ્ટિક્સ અને દેશી બૉમ્બથી ભરેલા ૪ કોથળા મળી આવ્યાં

નલહાટીના લોકનમારા ગામમાં સૂમસામ મકાનમાં વિસ્ફોટક સામગ્રી મળી આવી હતી

પ્રતીકાત્મક તસવીર (તસવીર સૌજન્યઃ એઆઇ)

પશ્ચિમ બંગાળના બીરભૂમ જિલ્લામાં સ્વતંત્રતા-દિવસ પહેલાં ઘણા વિસ્ફોટકોનો જથ્થો મળી આવ્યો છે, જેમાં જિલેટિન સ્ટિક્સ અને દેશી બૉમ્બનો સમાવેશ છે. રામપુરહાટના પઠાનવાડા વિસ્તારમાં એક વ્યક્તિના ઘરેથી ૩૦૪ જિલેટિન સ્ટિક્સ મળી આવી હતી. એક અલગ સ્થળેથી ૩૮ કિલો જિલેટિન સ્ટિક્સ જપ્ત કરવામાં આવી હતી.

મલ્લારપુર વિસ્તારના કોટ ગામમાં માટીના મકાનમાંથી ૪ કોથળા ભરેલા દેશી બૉમ્બ મળી આવ્યા હતા. નલહાટીના લોકનમારા ગામમાં સૂમસામ મકાનમાં વિસ્ફોટક સામગ્રી મળી આવી હતી, જેમાં અમોનિયમ નાઇટ્રેટ અને ડિટોનેટરનો સમાવેશ છે.

સરહદ પર બે શંકાસ્પદ ઝડપાયા

પશ્ચિમ બંગાળ સ્પેશ્યલ ટાસ્ક ફોર્સે મંગળવારે ભારત-બંગલાદેશ સરહદ પર બે શંકાસ્પદોની ધરપકડ કરી હતી જેમાં એક પાકિસ્તાની નાગરિકનો સમાવેશ છે. તે પાકિસ્તાનના ફૈસલાબાદનો રહેવાસી રઉફ ઉર્ફે વહાબ આલમ છે. તે ૨૦૧૨માં નેપાલના રસ્તે ભારતમાં ઘૂસી ગયો હતો.