ચીનમાં ૧૦૦ રોબો માટે યોજાશે મૅરથૉન

૧૯ એપ્રિલે ચીનના બીજિંગમાં ઈ-ટાઉન તરીકે જાણીતા વિસ્તારમાં રોબોઝ ૨૧ કિલોમીટરની મૅરથૉન દોડશે

રેસમાં ૭૦ ટીમોએ ટ્રાયલ-રન કરી લીધી છે

રવિવારે ચીનના રોબોજગતમાં મોટો મુકાબલો થવાનો છે. આ મુકાબલો છે મૅરથૉન દોડનો. એમાં માણસો નહીં પણ અલગ-અલગ કંપનીઓના રોબો ભાગ લેવાના છે. ૧૯ એપ્રિલે ચીનના બીજિંગમાં ઈ-ટાઉન તરીકે જાણીતા વિસ્તારમાં રોબોઝ ૨૧ કિલોમીટરની મૅરથૉન દોડશે. એમાં ૧૦૦થી વધુ રોબોએ ભાગ લીધો છે. આ રેસ બે ભાગમાં વહેંચી દેવાઈ છે. એક કૅટેગરીમાં એવા રોબો હશે જે કોઈ માણસની મદદ વિના જાતે રસ્તો નક્કી કરીને દોડશે. બીજી કૅટેગરીમાં રિમોટ કન્ટ્રોલના માધ્યમથી રોબોની દિશા ઑપરેટ કરવામાં આવશે. રેસમાં ૭૦ ટીમોએ ટ્રાયલ-રન કરી લીધી છે. એમાં રોબોનું નૅવિગેશન, સંતુલન અને વચ્ચે કોઈ અડચણ આવે તો રિસ્પૉન્સ કેવો છે એ તપાસવામાં આવ્યું છે. ટ્રાયલ દરમ્યાન કેટલાક રોબોની બૅટરી જલદી ખતમ થઈ ગયેલી તો કેટલાક રસ્તો ઓળખવામાં થાપ ખાઈને ક્યાંક બીજે જ પહોંચી ગયા હતા તો કેટલાક ચાલતી વખતે ઠોકર ખાઈને પડી ગયા હતા. આ બીજી રોબો મૅરથૉન છે. ગયા વર્ષે યોજાયેલી રોબો મૅરથૉનમાં ૨૧ રોબોએ ભાગ લીધો હતો અને એમાંથી ૬ જ રોબો ફિનિશ-લાઇન સુધી પહોંચ્યા હતા.