૭૭ વર્ષના બુઝુર્ગ લિફ્ટની ડક્ટમાંથી અંદર પડી ગયા

દસ દિવસ લિફ્ટ બરાબર ચાલી, વાસ આવતાં ખબર પડી

ગિરી ગોસ્વામી

મધ્ય પ્રદેશના ભોપાલમાં ચિનાર ડ્રીમ સિટી નામના બિલ્ડિંગમાં ગિરી ગોસ્વામી નામના ૭૭ વર્ષના વડીલ ડક્ટમાં પડી ગયા હતા. જોકે આ ઘટના વખતે કોઈ ત્યાં નહોતું એટલે ખબર જ ન પડી. વડીલ ગુમ થઈ ગયા એટલે પહેલાં તો પરિવારજનોએ સોસાયટીમાં બધે તપાસ કરાવી, પરંતુ કોઈ ભાળ ન મળતાં તેમના ગુમ થવાની ફરિયાદ પોલીસમાં નોંધાવી હતી. હેરાનીની વાત એ છે કે લિફ્ટ એ પછી પણ ઉપર-નીચે થતી રહી, પણ કોઈને ખબર ન પડી કે લિફ્ટના ડક્ટમાં કોઈ ફસાઈ ગયું છે. જ્યારે ખાડામાં પડેલું શબ સડવા લાગ્યું ત્યારે લિફ્ટમાં ખૂબ ગંદી વાસ આવવા લાગી. એ વખતે સંદેહ જતાં લિફ્ટ રોકીને નીચે જોવામાં આવ્યું તો ત્યાં વડીલનું સડી ગયેલું શબ મળી આવ્યું હતું. પરિવારજનોનું કહેવું છે કે દાદા કંઈક કામસર બહાર જવા માટે લિફ્ટમાં જ નીચે ગયા હતા, પરંતુ લિફ્ટના ડક્ટમાં અંદર કેવી રીતે પડી ગયા એ નથી સમજાતું.