AI-રૂમમેટે કામવાળી દ્વારા ઘરમાંથી થતી ફળોની ચોરી પકડી પાડી

આ સિસ્ટમ કિચનમાં સફાઈનું કામ કેવી રીતે થઈ રહ્યું છે એ પણ ટ્રૅક કરે છે

તસવીર સૌજન્યઃ સોશ્યલ મીડિયા

બૅન્ગલોરના પંકજ નામના એક ટેક પ્રોફેશનલે પોતાના ઘરમાં AI-રૂમમેટ એટલે કે આર્ટિફિશ્યલ ઇન્ટેલિજન્સ આધારિત સિસ્ટમ લગાવીને કામ કરવા આવતી બાઈની ચોરી પકડી પાડી હતી. પંકજે કિચનમાં AI-બેઝ્ડ સર્વેલન્સ સિસ્ટમ લગાવી હતી. એ સિસ્ટમ જ્યારે પણ ફ્રિજ ખૂલે અને એમાંથી સામાન કાઢવામાં આવે કે મૂકવામાં આવે ત્યારે ફોન પર અલર્ટ મેસેજ આપે છે. આ સિસ્ટમ કિચનમાં સફાઈનું કામ કેવી રીતે થઈ રહ્યું છે એ પણ ટ્રૅક કરે છે. કામ પૂરું થયા પછી સ્લૅબ સાફ કરવામાં આવ્યો છે કે નહીં એ પણ રેકૉર્ડ કરે છે. પંકજના ઘરમાંથી વારંવાર ફળો, શાકભાજી અને ખાવા-પીવાની ચીજો ગાયબ થતી હતી. AI રૂમમેટ લગાવ્યા પછી રિપોર્ટમાં ખબર પડી કે તેની ગેરહાજરીમાં વીકમાં બે વાર કિચનમાંથી ફળો અને ખાવા-પીવાનો સામાન ચોરાયો હતો. રિપોર્ટની સાથે ફુટેજ પણ નોંધવામાં આવ્યું હતું. એ કામવાળીની ચોરી પુરવાર કરવા માટે પૂરતું હતું. પંકજે આ સિસ્ટમ અને તેના ઘરે થતી ચોરીની ઘટનાની વાત સોશ્યલ મીડિયા પર શૅર કરી હતી અને ચોરી નાની હોવાથી કામવાળી વિરુદ્ધ ફરિયાદ કરવાને બદલે તેને પાણીચું પકડાવી દીધું હતું.