પાકો રસ્તો બનાવવા માટે પાથરેલું તાજું સિમેન્ટ અને કૉન્ક્રીટ ખોદીને લઈ ગયા ગામવાસીઓ

રોડની ચોરીનો વિડિયો સોશ્યલ મીડિયામાં જબરદસ્ત વાઇરલ થયો છે

કહેવાય છે કે લોકોએ આ કાચા માલથી પોતાનાં ઘરોનું રિપેરિંગ કામ કર્યું હતું

બિહારના જહાનાબાદ જિલ્લાના ઔદાન બિગહા ગામમાં મુખ્યમંત્રી ગ્રામ સડક યોજના અંતર્ગત બની રહેલા એક રોડની ચોરીનો વિડિયો સોશ્યલ મીડિયામાં જબરદસ્ત વાઇરલ થયો છે. રસ્તો બનાવવા માટે કર્મચારીઓએ સિમેન્ટ અને કૉન્ક્રીટનો માલ ભર્યો હતો, પરંતુ ગામલોકો પાવડો અને કોદાળી લઈને આવ્યા અને તેમની પાસે જે વાસણ મળ્યું એ લઈને એ તાજા રોડના કાચા મટીરિયલને લૂંટીને લઈ ગયા હતા. કહેવાય છે કે લોકોએ આ કાચા માલથી પોતાનાં ઘરોનું રિપેરિંગ કામ કર્યું હતું. વિડિયો જોઈને કેટલાકે લખ્યું હતું સરકારી સંપત્તિનો આવો દુરુપયોગ? જોકે નિષ્ણાતોનું કહેવું છે કે આવું ત્યારે જ થાય જ્યારે સ્થાનિકોમાં હદપારની ગરીબી અને પાયાની જરૂરિયાતો પણ પૂરી કરવાના ફાંફાં હોય.