દીકરો જેની સાથે પ્રેમલગ્ન કરવાનો હતો તે છોકરી તો પોતાની દીકરી નીકળી

જોકે એમ છતાં માએ તેમનાં લગ્ન કરાવ્યાં કેમ કે દીકરો દત્તક લીધેલો હતો

પરણીને વહુ નહીં પણ દીકરી જ ઘરમાં આવી

ચીનમાં એક અનોખી ઘટના બની. સુજૌ નામના ગામમાં એક મા પોતાના દીકરાનાં લગ્નની તૈયારીઓ હોંશે-હોંશે કરી રહી હતી ત્યારે તેને જીવનનો સૌથી આશ્ચર્યજનક આંચકો મળ્યો હતો. દીકરો પ્રેમલગ્ન કરી રહ્યો હતો અને તે પહેલી વાર પોતાની દીકરાની વહુને મળી રહી હતી. દુલ્હાની મા એ માટે ખૂબ જ ઉત્સુક હતી. જોકે જેવી દુલ્હનને જોઈ કે તેના મનમાં હલચલ મચી. કન્યાના હાથ પર એક બર્થમાર્ક હતો. આ એવો જ બર્થમાર્ક હતો જેવો ૨૦ વર્ષ પહેલાં ખોવાયેલી તેની દીકરીના હાથમાં હતો. દીકરી સાવ ચાર-પાંચ વર્ષની હતી ત્યારે જ ખોવાઈ ગયેલી અને ૨૦ વર્ષ સુધી તેનો કોઈ પત્તો ન લાગતાં મહિલા આશા ખોઈ ચૂકી હતી કે હવે તેને દીકરી મળશે.

જોકે દીકરાના વહુના સ્વરૂપમાં જે કન્યા આવી તે જ તેની દીકરી નીકળતાં તે જબરદસ્ત ખુશ થઈ ગઈ. તેણે દુલ્હનનાં માતા-પિતા પાસે જઈને સવાલ કર્યો કે આ તમારી પોતાની દીકરી છે કે દત્તક લીધેલી? તે દત્તક લીધેલી દીકરી હતી અને તેમણે તે છોકરીને કોઈક ચોર પાસેથી રેસ્ક્યુ કરીને બચાવી હતી.

આ સાંભળીને કન્ફર્મ થઈ ગયું કે દીકરાની પત્ની તરીકે જે આવી રહી છે તે તેની જ દીકરી છે. મા-દીકરીનું મિલન એકદમ ઇમોશનલ થઈ ગયું. જોકે એ જોઈને કેટલાક લોકોને ચિંતા થઈ કે હવે દીકરાના પ્રેમનું શું? શું તેણે પોતાના ભાઈને પ્રેમ કરેલો? હવે ભાઈ સાથે કઈ રીતે લગ્ન કરાય? જોકે આ વાર્તામાં હજીયે એક ટ્વિસ્ટ હતો તે એ કે પેલી મહિલાનો જે દીકરો હતો તે પણ દત્તક લીધેલો હતો. તેની સાથે મહિલાને લોહીનો કોઈ સંબંધ નહોતો. એટલે લગ્ન એમ જ રાબેતા મુજબ ચાલુ રાખવામાં આવ્યાં. મહિલાએ દીકરાનાં પ્રેમલગ્ન કરાવવાની તૈયારી કરી હતી, પણ હકીકતમાં તેની દીકરીનાં લગ્ન થઈ ગયાં અને પરણીને વહુ નહીં પણ દીકરી જ ઘરમાં આવી.