ચાલુ ક્લાસે ચોરીછૂપી ખાવાની ચીનમાં અસલ કૉમ્પિટિશન શરૂ થઈ

એક શૉપિંગ મૉલમાં આ સ્પર્ધા યોજાયેલી

બાળપણમાં ચાલુ ક્લાસે ચોરીછૂપી કંઈક ને કંઈક ખાવાની મજા લગભગ દરેક બાળકે ક્યારેક લીધી હશે. જોકે ટીચરને ખબર ન પડે એ રીતે નજર ચુરાવીને ખાવાની આ કળાની ચીનમાં એક કૉમ્પિટિશન થઈ રહી છે. ચીનમાં થોડા સમય પહેલાં સૌપ્રથમ ચૂપચાપ ખાવાની સ્પર્ધા યોજાઈ હતી. એમાં લગભગ ૨૦૦૦ લોકોએ ભાગ લીધો હતો. એક શૉપિંગ મૉલમાં આ સ્પર્ધા યોજાયેલી. એમાં સ્કૂલ જેવી જ ડેસ્ક મૂકવામાં આવી હતી. એની સામે બ્લૅક બોર્ડ હતું. એ ક્લાસમાં સતત ટીચર્સ અહીંતહીં ફરતા રહે છે. આ સ્પર્ધાનો નિયમ હતો કે ૧૦ મિનિટનો સમય આપવામાં આવશે. એ દરમ્યાન તેમણે રાઇસ કે દલિયાનો આખો બાઉલ ટીચરની નજરમાં આવ્યા વિના ખાઈ જવાનો. સ્પર્ધકો એ માટે ટેક્સ્ટ-બુકની આડશ લઈ શકે છે. આ સ્પર્ધામાં સ્કૂલોનાં બાળકોથી લઈને રિટાયર્ડ લોકોએ ભાગ લીધો હતો. આ સ્પર્ધામાં વિનર બન્યો હતો ૩૦ વર્ષનો એક માણસ. તેણે ઑર્ગેનાઇઝર્સ અને ટીચરથી નજર ચુરાવીને સૌથી વધુ ખાવાનું ખાધું હતું અને એક ગ્રામ સોનાનું ઇનામ જીતી લીધું હતું.