ઘેટાં ચરાવવા બે જણની નિયુક્તિ માટે કંપનીએ જાહેરાત આપી હતી, ૭૦૦થી વધુ લોકોની અરજી આવી

ઍડ આપતી વખતે કંપનીને હતું કે જાહેરાતથી કોઈ ઘેટાં ચરાવવાનું કામ કરવા તૈયાર થશે ખરું?

પ્રતીકાત્મક તસવીર (તસવીર સૌજન્યઃ એઆઇ)

ચીનમાં રોજગારના બજારોમાં એવી મંદી ચાલી રહી છે કે ભણેલાગણેલા લોકો હોય કે અભણ, કામ મેળવવા માટે તરસે છે. વળી, કેટલાક યુવાનો ૯થી ૬ વાગ્યાની કૉર્પોરેટ ઑફિસના કામથી એટલા કંટાળ્યા છે કે ગામ ભણી શિફ્ટ થઈને ગામોમાં સાદું કામ અને સાદું જીવન જીવવાના સપનાં જોઈ રહ્યા છે. આ વાતનો પુરાવો છે કે તાજેતરમાં ચીનમાં એક કંપનીના માલિકે ઘાસનાં બે મેદાનોમાં ઘેટાં ચરાવવાનું કામ કરી શકે એવા બે લોકો જોઈએ છે એવી જાહેરાત કરી હતી. ઍડ આપતી વખતે કંપનીને હતું કે જાહેરાતથી કોઈ ઘેટાં ચરાવવાનું કામ કરવા તૈયાર થશે ખરું? જોકે તેમને બિલકુલ અંદાજ નહોતો કે તેમની સામે અલગ જ પ્રકારની મુસીબત ઊભી થઈ જશે. જગ્યા ખાલી હતી બે વ્યક્તિની, પરંતુ આ જાહેરાતના જવાબમાં ૭૦૦થી વધુ અરજીઓ કંપનીને મળી. નવાઈની વાત એ હતી કે અરજી કરનારા કંઈ જે-તે ગામમાં રહેતા ગ્રામીણો જ નહોતા, આસપાસનાં શહેરોમાં રહેતા ગ્રૅજ્યુએટ્સ અને ડિગ્રીધારી યુવાનો પણ હતા. યુનિવર્સિટીમાં ટૉપ કરનારા એક યુવાને પણ એ જૉબ માટે અપ્લાય કર્યું હતું. શાંઘાઈ અને ચોન્ગકિન્ગ જેવાં મહાનગરો છોડીને આ કામ માટે ગામમાં શિફ્ટ થવાની તૈયારી પણ અનેક યુવાનોએ બતાવી હતી.