આ કેવી આસ્થા? માથા પર બાપ્પા સાથે બાઇકરે કર્યા જોખમી સ્ટન્ટ

ભગત સિંહ નામના આ સ્ટન્ટમૅને ગણેશજીની મૂર્તિ માથા પર મૂકીને પૂરપાટ ઝડપે દોડતી બાઇક પર ઊભા રહીને આ જોખમી સ્ટન્ટ કર્યા હતા

સ્ટન્ટમાં યુવકે પોતાની સાથે બાપ્પાની મૂર્તિની ગરિમા અને પવિત્રતાને પણ જાણે દાવમાં મૂકી દીધી છે

ગણેશોત્સવના પાવન તહેવારના દિવસો દરમ્યાન સોશ્યલ મીડિયા પર લાઇક્સ અને વ્યુઝ મેળવવા માટે લોકો કેટલી હદે જઈ શકે છે એનો એક ચોંકાવનારો કિસ્સો સામે આવ્યો છે. માલેગાવના બાઇકર સ્ટન્ટમૅને ગણપતિબાપ્પાની મૂર્તિ સાથે ચાલતી મોટરસાઇકલ પર અત્યંત જોખમી કરતબો કર્યાં છે. ભગત સિંહ નામના આ સ્ટન્ટમૅને ગણેશજીની મૂર્તિ માથા પર મૂકીને પૂરપાટ ઝડપે દોડતી બાઇક પર ઊભા રહીને આ જોખમી સ્ટન્ટ કર્યા હતા. એ સ્ટન્ટમાં યુવકે પોતાની સાથે બાપ્પાની મૂર્તિની ગરિમા અને પવિત્રતાને પણ જાણે દાવમાં મૂકી દીધી છે.

સ્ટન્ટમૅને પહેલાં બાપ્પાની નાની મૂર્તિ પોતાના માથા પર મૂકી દીધી હતી. આટલું ઓછું હોય એમ ચાલતી બાઇકે આ મહાશય સીટ પર બન્ને પગ રાખીને સીધા ઊભા થઈ ગયા અને બૅલૅન્સ જાળવીને તેજ રફ્તારમાં બાઇક ચલાવવા લાગ્યા. જો સંતુલન જરા પણ બગડે તો પોતે પણ નીચે પડી જાય અને મૂર્તિ પણ ખંડિત થાય એટલી રફ્તારમાં તેણે બાઇક દોડાવી-દોડાવીને કરતબ બતાવ્યાં હતાં. જો સહેજ પણ ચૂક થઈ હોત તો બાપ્પાની મૂર્તિ ખંડિત થાત અને યુવકનો જીવ પણ જોખમમાં મુકાઈ જાત.

સોશ્યલ મીડિયા યુઝસે પોલીસતંત્રને ટૅગ કરીને આવા જોખમી સ્ટન્ટ કરનારાઓ વિરુદ્ધ ધાક બેસાડતી કાનૂની કાર્યવાહી કરવાની માગણી કરી છે.