બે પતિ ધરાવતી હિમાચલ પ્રદેશની મહિલાએ દીકરીને જન્મ આપ્યો

સુનીતા પણ સોશ્યલ મીડિયા પર ખૂબ ઍક્ટિવ રહે છે અને તેણે ‘સિરમોરી જોડીદાર ભાઈ’ નામનું અકાઉન્ટ બનાવ્યું છે

તસવીર સૌજન્યઃ સોશ્યલ મીડિયા

હિમાચલ પ્રદેશના સિરમોર જિલ્લાના શિલાઈ ગામમાં સુનીતા નામની છોકરી બે સગા ભાઈઓને પરણી એ સમાચાર ખૂબ ચર્ચામાં આવ્યા હતા. તેનાં લગ્નના ૧૦ મહિના પછી હવે તેના ઘરમાં બાળકની કિલકારી ગૂંજી ઊઠી છે. તેના પતિ પ્રદીપ નેગી અને કપિલ નેગીએ પિતા બનવાની ખુશી સોશ્યલ મીડિયામાં શૅર કરી હતી. પ્રદીપ અને કપિલે લખ્યું હતું, ‘આજે અમારી જિંદગીનો ખૂબસૂરત અને યાદગાર દિવસ છે. અમારી નાનકડી ત્રિપુટીમાં એક નાના મહેમાનનું આગમન થયું છે. એનાથી અમારા ઘરમાં નહીં, દિલમાં ખુશીઓ ઊભરાઈ છે.’

સુનીતા પણ સોશ્યલ મીડિયા પર ખૂબ ઍક્ટિવ રહે છે અને તેણે ‘સિરમોરી જોડીદાર ભાઈ’ નામનું અકાઉન્ટ બનાવ્યું છે. હિમાચલ પ્રદેશમાં જોડીદાર પ્રથા અંતર્ગત એક જ પરિવારના બે અથવા વધુ ભાઈઓ સાથે લગ્ન કરવાની પરંપરા છે. મોટા ભાગના લોકો હવે આ પરંપરા પાળતા નથી, પરંતુ પ્રદીપ અને કપિલ નેગીએ જૂની પરંપરા પાળી હતી. એક ભાઈ હાલમાં નોકરી માટે વિદેશ રહે છે એટલે દીકરીના જન્મ વખતે સુનીતાની સાથે એક જ પતિ હતો.