રોડ જૅમ કરવા માટે ઇન્ફ્લુઅન્સરે ઓવરબ્રિજ પરથી પૈસા ઉડાડ્યા

સવાલ એ થાય કે શું યુવક પાસે વધારાના પૈસા હતા કે તેણે આવો સ્ટન્ટ કર્યો?

તસવીર સૌજન્યઃ સોશ્યલ મીડિયા

હરિયાણાના પાણીપતમાં એક યુવાને સોશ્યલ મીડિયા પર રીલ બનાવવા માટે નૅશનલ હાઇવેના એલિવેટેડ ઓવરબ્રિજ પરથી ચલણી નોટોનો વરસાદ શરૂ કરી દીધો હતો. એને કારણે નીચે ઊભેલા લોકો એ નોટ વીણવા લાગ્યા હતા. માત્ર વાહનચાલકો જ નહીં, મહિલાઓ પણ ત્યાં આવીને નોટો વીણવા લાગી હતી. એને કારણે થોડીક વાર માટે ટ્રાફિક જૅમ થઈ ગયો હતો. સવાલ એ થાય કે શું યુવક પાસે વધારાના પૈસા હતા કે તેણે આવો સ્ટન્ટ કર્યો? ના, વાત એમ છે કે આ ભાઈએ પહેલેથી જાહેરાત કરી હતી કે પાણીપતના જી. ટી. રોડ પર તે ચોક્કસ સમયે ટ્રાફિક જૅમ કરશે. બંટી પંડિત નામના ઇન્સ્ટાગ્રામ હૅન્ડલ પરથી તેણે આ જાહેરાત કરી હતી. જ્યારે પૈસા હવામાં ઊડ્યા ત્યારે કેવો અફરાતફરીનો માહોલ થઈ ગયો એનો વિડિયો સોશ્યલ મીડિયામાં વાઇરલ થયો છે. લોકો પોતાના જીવની પરવા કર્યા વિના ટ્રાફિકની વચ્ચે નોટો વીણવા લાગ્યા હતા, જ્યારે પોલીસ ટ્રાફિકને સંભાળતી જોવા મળી હતી. આ વાઇરલ વિડિયો અને ટ્રાફિક પોલીસની ફરિયાદના આધારે પોલીસે અજ્ઞાત યુવક વિરુદ્ધ સામાન્ય લોકોનો જીવ જોખમમાં મૂકવાનો કેસ દાખલ કર્યો છે. હજી આ યુવાન કોણ છે એની ઓળખ થઈ શકી નથી.