કૅબ-ડ્રાઇવર થાકીને પાછળની સીટ પર સૂઈ ગયો, પૅસેન્જર જાતે ડ્રાઇવ કરીને લખનઉ પહોંચ્યો

શિવ મિશ્રા નામના યુવકે જોયું કે તેનો કૅબ-ડ્રાઇવર સતત ગાડી ચલાવીને ખૂબ જ થાકી ગયો છે એટલે તેણે ગુસ્સો કરવા કે ફરિયાદ કરવાને બદલે સ્ટીઅરિંગ પોતાના હાથમાં લઈ લીધું

આ સમગ્ર પ્રવાસનો વિડિયો શિવે ઇન્સ્ટાગ્રામ પર શૅર કર્યો હતો

નોએડાથી લખનઉ જઈ રહેલા એક કૅબ-પૅસેન્જર યુવકે માનવતા અને સમજદારીનું એવું ઉત્કૃષ્ટ ઉદાહરણ પૂરું પાડ્યું છે જેને જોઈને સોશ્યલ મીડિયા પર લોકો તેની પ્રશંસા કરતાં થાકતા નથી. શિવ મિશ્રા નામના યુવકે જોયું કે તેનો કૅબ-ડ્રાઇવર સતત ગાડી ચલાવીને ખૂબ જ થાકી ગયો છે એટલે તેણે ગુસ્સો કરવા કે ફરિયાદ કરવાને બદલે સ્ટીઅરિંગ પોતાના હાથમાં લઈ લીધું અને ડ્રાઇવરને પાછળની સીટ પર આરામથી સૂઈ જવા દીધો. આ સમગ્ર પ્રવાસનો વિડિયો શિવે ઇન્સ્ટાગ્રામ પર શૅર કર્યો હતો. વિડિયોમાં જોઈ શકાય છે કે શિવ પોતે ડ્રાઇવિંગ-સીટ પર બેસીને કાર ચલાવી રહ્યો છે, બાજુમાં તેનો ભાઈ બેઠો છે અને થાકેલો કૅબ-ડ્રાઇવર પાછળની સીટ પર આરામથી ઊંઘી રહ્યો છે. તે કહે છે, ‘ડ્રાઇવર ગઈ કાલથી સતત ગાડી ચલાવી રહ્યો હતો અને ખૂબ જ થાકી ગયો હતો. આવા સમયે હું જીદ કરી શકતો હતો કે મેં પૈસા ચૂકવ્યા છે એટલે તારે જ ગાડી ચલાવવી પડશે, પણ મેં ગુસ્સો કરવાને બદલે આ સ્થિતિને એક ઍડ્વેન્ચર ગણીને જાતે ડ્રાઇવિંગ કરવાનું નક્કી કર્યું.’ ઊંઘ કે થાકની હાલતમાં ડ્રાઇવિંગ કરવું અત્યંત જોખમી સાબિત થઈ શકે છે એટલે શિવના આ પગલાથી મુસાફરો અને ડ્રાઇવર બન્ને સુરક્ષિત રહ્યા.