બેચેની લાગવાથી ડ્રાઇવરે સાથીને સ્ટિયરિંગ થમાવ્યું, એની થોડી જ વારમાં તેને હાર્ટ-અટૅક આવ્યો

સતીશે જો સમજદારી બતાવીને સ્ટિયરિંગ સાથીને ન સોંપ્યું હોત અને અચાનક જ તે ઢળી પડ્યો હોત તો શું થાત એની કલ્પના પણ કમકમાં લાવી દે એમ છે.

૩૬ વર્ષના ડ્રાઇવર સતીશ રાવ

રાજસ્થાનના પાલી જિલ્લા પાસે ચાલતી બસમાં ૩૬ વર્ષના ડ્રાઇવર સતીશ રાવનું હાર્ટ-અટૅકથી મૃત્યુ થયું હતું. જોકે મૃત્યુ પહેલાં તેણે સાવધાની અને સમજદારી બતાવીને બસનું સ્ટિયરિંગ સાથીને સોંપી દીધું હતું. એને કારણે પ્રવાસીઓનો જીવ જોખમમાં મુકાતાં બચી ગયો હતો.

આ ઘટનાનો વિડિયો બસમાં લાગેલા કૅમેરામાં કેદ થઈ ગયો છે. રાતના સમયે બસ ચલાવી રહેલા સતીશને બેચેની લાગતી હોવાથી તેણે થોડા સમય માટે ક્લીનર સાથીને બસ ચલાવવા કહ્યું હતું. જોકે એ પછીની થોડી જ ક્ષણોમાં જે બન્યું એ ખૂબ ડરામણું હતું. સતીશ ડ્રાઇવરની બાજુમાં જ બેઠો હતો, પરંતુ બેઠાં-બેઠાં અચાનક જ તે ઢળી પડ્યો હતો. સાથી ડ્રાઇવરે પરિસ્થિતિ સંભાળીને બીજા લોકોની મદદથી સતીશને પાછળની સીટોમાં સૂવડાવ્યો હતો અને તરત જ નજીકની હૉસ્પિટલ તરફ બસ હંકારી ગયો હતો. જોકે હૉસ્પિટલમાં તપાસ કરતાં તેને મૃત ઘોષિત કરવામાં આવ્યો હતો. સતીશે જો સમજદારી બતાવીને સ્ટિયરિંગ સાથીને ન સોંપ્યું હોત અને અચાનક જ તે ઢળી પડ્યો હોત તો શું થાત એની કલ્પના પણ કમકમાં લાવી દે એમ છે.