ચીનમાં મહિલાઓના ગાર્મેન્ટ-સ્ટોરની બહાર નાચતા જોવા મળ્યા શર્ટલેસ પુરુષો

શોરૂમ ગર્લ્સના ગાર્મેન્ટ્સ માટેનો હતો અને એમાં પુરુષો ડાન્સ કરતા હતા

તસવીર સૌજન્યઃ સોશ્યલ મીડિયા

ચીનના હાંગઝોઉ શહેરમાં એક ગાર્મેન્ટ શોરૂમની બહાર ભલભલાનું ધ્યાન ખેંચાય એવું ઍડ્વર્ટાઇઝમેન્ટ કૅમ્પેઇન શરૂ થયું છે. સામાન્ય રીતે મહિલાઓનાં કપડાંની દુકાન હોય તો એની બહાર ડિસ્પ્લેમાં ગર્લ્સનાં મૅનિકિન્સ હોય અને એના પર છોકરીઓનાં કપડાં સજાવીને મૂકવામાં આવ્યાં હોય. જોકે આવું તો હવે બધે જ જોવા મળે છે. એનાથી લોકોનું ધ્યાન થોડું ખેંચાવાનું? હાંગઝોઉના લેડીઝ બુટિક કમ શોરૂમે લોકોનું ધ્યાન આકર્ષિત કરવા માટે એક અળવીતરો અખતરો કર્યો હતો જે સફળ પણ રહ્યો. જ્યાં મૅનિકિન્સ ડિસ્પ્લે કરવામાં આવે એ જગ્યાએ સ્ટોરવાળાએ શર્ટલેસ પુરુષ મૉડલ્સ ગોઠવી દીધા હતા. આ મૉડલ્સ મસ્ત અને ધમાકેદાર પાર્ટી-સૉન્ગ્સ પર ડાન્સ કરતા હતા. સ્ત્રીઓનાં કપડાંના શોરૂમમાં શર્ટલેસ પુરુષોને નાચતા કરવાનો આ અખતરો ખરેખર લોકોનું ધ્યાન ખેંચી શક્યો. એટલુંબધું અટેન્શન આ પ્રયોગને મળ્યું કે રોડ પર લોકોની ભીડ ભેગી થઈ ગઈ અને વાહનોનો ટ્રાફિક જૅમ થઈ ગયો. શોરૂમ ગર્લ્સના ગાર્મેન્ટ્સ માટેનો હતો અને એમાં પુરુષો ડાન્સ કરતા હતા. સ્વાભાવિક છે એનાથી સ્ત્રીઓ વધુ આકર્ષાઈ હતી. આવી ઍડ્વર્ટાઇઝમેન્ટ સ્ટોરની બહાર રોજ થાય છે કે ક્યારેક એ સ્પષ્ટ નથી થયું.