પરીક્ષા ખરાબ ગઈ હોવાથી હતાશ દીકરીને પિતાએ ૩ લાખ રૂપિયા ગિફ્ટ આપ્યા

આ વર્ષે પણ લગભગ ૫,૫૦,૦૦૦ વિદ્યાર્થીઓએ આ પરીક્ષા આપી હતી. સતત ૧૨ કલાકની મૅરથૉન એક્ઝામ એમાં આપવાની હોય છે જેમાં ભલભલા સ્ટુડન્ટ્સ ઢીલા પડી જાય છે. અનેક લોકો આ પરીક્ષા આપ્યા પછી હતાશ થઈ જાય છે.

પ્રતીકાત્મક તસવીર

સાઉથ કોરિયામાં કૉલેજ સ્કૉલેસ્ટિક એબિલિટી ટેસ્ટ (CSAT) નામની દુનિયાની સૌથી અઘરી ગણાતી પરીક્ષા દર વર્ષે લાખો વિદ્યાર્થીઓ આપે છે, પરંતુ એમાંથી ખૂબ જ ઓછા લોકો પાસ થાય છે. આ વર્ષે પણ લગભગ ૫,૫૦,૦૦૦ વિદ્યાર્થીઓએ આ પરીક્ષા આપી હતી. સતત ૧૨ કલાકની મૅરથૉન એક્ઝામ એમાં આપવાની હોય છે જેમાં ભલભલા સ્ટુડન્ટ્સ ઢીલા પડી જાય છે. અનેક લોકો આ પરીક્ષા આપ્યા પછી હતાશ થઈ જાય છે. આ વર્ષે ૧૪ નવેમ્બરે સાઉથ કોરિયામાં આ પરીક્ષા લેવાઈ હતી. એ પછી અનેક સ્ટુડન્ટ્સ ડિપ્રેશનમાં હોવાના સમાચાર બહાર આવ્યા હતા. જોકે સ્થાનિક વર્તમાનપત્રમાં એક સમાચાર છપાયા છે જેમાં એક છોકરીએ પોતાના પપ્પાનો મેસેજ શૅર કર્યો છે. વાત એમ હતી કે આ છોકરીની એક્ઝામ પણ ખરાબ ગઈ હતી અને એ પછી તે ખૂબ હતાશ થઈ ગઈ હતી. ઘરથી દૂર રહેતી આ છોકરીએ પેરન્ટ્સ સાથે વાત કરી, પણ તેનું મન નહોતું લાગતું. ત્યારે તેના પપ્પાએ સોશ્યલ મીડિયા થકી એક ઇન્સ્ટન્ટ મેસેજ મોકલ્યો અને સાથે પાંચ લાખ કોરિયન વૉન એટલે કે લગભગ ૩ લાખ રૂપિયા મોકલ્યા. મેસેજમાં લખ્યું હતું, ‘મારી સૌથી લાડકી નાની દીકરી, ખરાબ રિઝલ્ટ આવે તો નિરાશ ન થઈશ. હું તારી અને તારી બહેન માટે ખૂબ મહેનત કરું છું અને મારી કાબેલિયત હજીયે એટલી જ છે. મારી બન્ને રાજકુમારીઓને આરામથી રહેવા માટે પૈસા કમાઈ શકું એમ છું. પપ્પા પર ભરોસો કરજો અને આગળ વધો. ફરીથી આ પરીક્ષા આપવા ઇચ્છતી હો તો જરૂર એની તૈયારી કર, પણ ન આપવી હોય તો પણ ચિંતા ન કર. કૉલેજ છોડ અને જે મન કહે એ કર.’ સોશ્યલ મીડિયા પર આ પ્રસંગની લોકો ખૂબ સરાહના કરી રહ્યા છે. સંતાનો પર પરીક્ષા અને પર્ફોર્મન્સનું પ્રેશર બનાવવાને બદલે તેમનું મનોબળ વધારતા પિતા પ્રશંસનીય છે.