મૅચમાં આમંત્રણ ન મળતાં ગુસ્સે ભરાયેલા ભાઈએ ચાલુ મૅચની વચ્ચે પિચ પર ટ્રૅક્ટર ફેરવી દીધું

જલગાંવમાં ગ્રામીણ વિસ્તારની ટુર્નામેન્ટની ફાઇનલ મૅચ ચાલી રહી હતી

તસવીર સૌજન્યઃ સોશ્યલ મીડિયા

મહારાષ્ટ્રના જળગાંવ જિલ્લાના ધરનગાંવમાં એક ક્રિકેટ ટુર્નામેન્ટ ચાલી રહી હતી, પરંતુ મૅચ દરમ્યાન એક એવી બબાલ થઈ કે ફાઇનલ મૅચ અધવચ્ચે જ રોકી દેવી પડી. કારણ એ હતું કે મૅચ ચાલુ હતી અને પ્લેયરો મેદાનમાં રમી રહ્યા હતા ત્યારે ગામના એક ભાઈ ટ્રૅક્ટર લઈને મેદાનમાં ઘૂસી ગયા. મેદાનમાં ઘૂસ્યા એટલું જ નહીં, પિચને ખોદી પણ કાઢી. જલગાંવમાં ગ્રામીણ વિસ્તારની ટુર્નામેન્ટની ફાઇનલ મૅચ ચાલી રહી હતી. પહેલી ટીમે ૭.૫ ઓવરમાં પાંચ વિકેટે ૫૬ રન બનાવી લીધા હતા. મૅચ રોમાંચક મોડ પર હતી અને એ જ વખતે તે ભાઈએ પિચ ખોદી કાઢવાનું કામ કર્યું. સ્થાનિક લોકોના કહેવા મુજબ જેણે આ કારસ્તાન કર્યું હતું તે ગામનો મોટો માણસ હતો. તેને મૅચમાં આમંત્રિત કરવામાં ન આવતાં ગુસ્સે ભરાઈને પિચ જ બગાડી દીધી. પિચ ખરાબ થઈ જતાં મૅચ રદ થઈ ગઈ. ગામલોકોએ પણ પેલા માણસ વિરુદ્ધ ફરિયાદ કરાવી નથી.