૩૪ મિનિટમાં ૬૭ ગુલાબજાંબુ સફાચટ કરીને ૧૦,૦૦૦ રૂપિયા જીતી આ કન્યા

એક કન્ટેન્ટ-ક્રીએટરે એક છોકરી સમક્ષ એવી શરત મૂકી કે ૫૦૦૦ રૂપિયા મેળવવા માટે તે કેટલાં ગુલાબજાંબુ ખાઈ શકશે? આ છોકરીએ કહ્યું કે ૬૭

હાલ આ સ્વીટ ચૅલેન્જનો વિડિયો ઇન્ટરનેટ પર ભારે ધૂમ મચાવી રહ્યો છે

સોશ્યલ મીડિયા પર અવનવી ફૂડ-ચૅલેન્જના વિડિયો વાઇરલ થતા રહેતા હોય છે, પરંતુ તાજેતરમાં એક છોકરીએ જે કરી બતાવ્યું છે એ જોઈને દંગ રહી જવાય છે. એક કન્ટેન્ટ-ક્રીએટરે એક છોકરી સમક્ષ એવી શરત મૂકી કે ૫૦૦૦ રૂપિયા મેળવવા માટે તે કેટલાં ગુલાબજાંબુ ખાઈ શકશે? આ છોકરીએ કહ્યું કે ૬૭.

આ ચૅલેન્જ શરૂ થવાની સાથે છોકરીએ પહેલી ૭ મિનિટમાં ગુલાબજાંબુનું એક બૉક્સ ખાલી કરી નાખ્યું. ત્યાર બાદ એક પછી એક પૅકેટ સાફ થવા લાગ્યાં. દુકાનદાર પણ એક બૉક્સ પૂરું થાય એ પહેલાં બીજું ભરવા દોડાડોડી કરવા લાગ્યો હતો. આઠમા બૉક્સ સુધી પહોંચતાં-પહોંચતાં છોકરીએ પોતે જ મજાકમાં કહ્યું કે તેને શુગર-રશ એટલે કે હાઈ શુગર થઈ રહી છે, પણ તેની સ્પીડ ઓછી નહોતી થઈ.

આખરે માત્ર ૩૪ મિનિટમાં ૬૭ ગુલાબજાંબુ પેટમાં પધરાવીને તેણે આ ચૅલેન્જ પૂરી કરી જેથી અંતમાં છોકરીને એક મોટું સરપ્રાઇઝ પણ મળ્યું. છોકરી તે કન્ટેન્ટ-ક્રીએટરને સોશ્યલ મીડિયા પર ફૉલો કરતી હોવાને કારણે તેને ઇનામના ૫૦૦૦ રૂપિયા ઉપરાંત બીજા ૫૦૦૦ રૂપિયા બોનસરૂપે મળ્યા.

આમ માત્ર ૩૪ મિનિટમાં ૬૭ ગુલાબજાંબુ ઝાપટીને આ છોકરી સીધી ૧૦,૦૦૦ રૂપિયા રોકડા લઈને ઘરે ગઈ. હાલ આ સ્વીટ ચૅલેન્જનો વિડિયો ઇન્ટરનેટ પર ભારે ધૂમ મચાવી રહ્યો છે.