13 August, 2026 02:14 PM IST | Mumbai | Gujarati Mid-day Online Correspondent
એશિયન ગેમ્સ માટે શ્રેયસ અય્યર ભારતીય પુરુષ ટીમની કપ્તાની કરશે
આઈચી-નાગોયા ૨૦૨૬ એશિયન ગેમ્સ (Nagoya 2026 Asian Games) માટે ક્રિકેટ સ્પર્ધાઓના અધિકૃત શિડ્યુલ અને ડ્રોની જાહેરાત (Asian Games 2026 Cricket Schedule announced) કરવામાં આવી છે, જેમાં ડિફેન્ડિંગ ચેમ્પિયન ભારત (India) માટે જાપાન (Japan)માં પોતાનો T20 ગોલ્ડ મેડલ જાળવી રાખવાનો માર્ગ સ્પષ્ટ થઈ ગયો છે. પુરૂષ અને મહિલા બંને વર્ગની મેચો આઈચી પ્રીફેક્ચરના નિશિન સ્થિત કોરોગી એથ્લેટિક પાર્ક (Korogi Athletic Park in Nisshin, Aichi Prefecture) ખાતે રમાશે. ઈન્ટરનેશનલ ક્રિકેટ કાઉન્સિલ (International Cricket Council) દ્વારા આ ટૂર્નામેન્ટની તમામ મેચોને પૂર્ણ T20 ઈન્ટરનેશનલનો દરજ્જો આપવામાં આવ્યો છે.
મહિલા સ્પર્ધા ૧૭ સપ્ટેમ્બરથી ૨૨ સપ્ટેમ્બર દરમિયાન યોજાશે, જે ૨૦મી એશિયન ગેમ્સના સત્તાવાર ઉદ્ઘાટન સમારોહના બે દિવસ પહેલા શરૂ થશે. આ ટૂર્નામેન્ટ ૮ ટીમો વચ્ચેની સીધી નોકઆઉટ ફોર્મેટ પર રમાશે, જેમાં ટોચનું રેટિંગ ધરાવતી એશિયન ટીમોને ક્વાર્ટર ફાઈનલ રાઉન્ડમાં સીધો પ્રવેશ આપવામાં આવ્યો છે.
ડિફેન્ડિંગ ગોલ્ડ મેડાલિસ્ટ ભારતીય મહિલા ટીમ (Indian Cricket Team) ક્વાર્ટર ફાઈનલમાં યજમાન દેશ જાપાન(Japan) સામે પોતાના અભિયાનની શરૂઆત કરશે. આ મેચની વિજેતા ટીમ સેમિફાઈનલમાં બાંગ્લાદેશ (Bangladesh) અથવા પીપલ્સ રિપબ્લિક ઓફ ચાઈના (People’s Republic of China) સામે ટકરાશે. મહિલા ડ્રોની બીજી તરફ શ્રીલંકા(Sri Lanka)નો સામનો મલેશિયા (Malaysia) સામે થશે, જ્યારે પાકિસ્તાન (Pakistan) ક્વાર્ટર ફાઈનલમાં થાઈલેન્ડ (Thailand) સામે રમશે.
પુરુષોની T20 ટૂર્નામેન્ટ ૨૪ સપ્ટેમ્બરથી ૩ ઓક્ટોબર દરમિયાન બે તબક્કામાં યોજાવાની છે, જેમાં ૧૦ ટીમો ભાગ લેશે. ટોચની ચાર સીડેડ ટીમો - ભારત, પાકિસ્તાન, શ્રીલંકા અને બાંગ્લાદેશને ક્વાર્ટર ફાઈનલમાં સીધો પ્રવેશ મળ્યો છે.
બાકીની છ ટીમો ૨૪ થી ૨૬ સપ્ટેમ્બર દરમિયાન પ્રિલિમિનરી ગ્રુપ સ્ટેજમાં ક્વાર્ટર ફાઈનલની બાકીની ચાર જગ્યાઓ સુરક્ષિત કરવા માટે સ્પર્ધા કરશે. ગ્રુપ A માં અફઘાનિસ્તાન (Afghanistan), જાપાન અને નેપાળ (Nepal) નો સમાવેશ થાય છે, જ્યારે ગ્રુપ B માં હોંગકોંગ (Hong Kong), ચાઈના, મલેશિયા અને ઓમાન (Oman) સામેલ છે. દરેક ગ્રુપમાંથી ટોચની બે ટીમો ૨૮ સપ્ટેમ્બરથી શરૂ થતી ક્વાર્ટર ફાઈનલમાં પહોંચશે, જ્યાં તેમનો સામનો ચાર મુખ્ય સીડેડ ટીમો સામે થશે.
હાંગઝોઉ ૨૦૨૩માં એશિયન ગેમ્સ ક્રિકેટમાં પદાર્પણ કર્યા બાદ ભારત પોતાના અજેય રેકોર્ડ સાથે આઈચી-નાગોયા ગેમ્સમાં પ્રવેશ કરશે. ચીનમાં યોજાયેલી છેલ્લી આવૃત્તિમાં ભારતીય પુરુષ અને મહિલા બંને ટીમોએ પોતાના પ્રથમ પ્રદર્શનમાં જ ગોલ્ડ મેડલ જીત્યા હતા, જેમાં મહિલા ટીમે શ્રીલંકાને ૧૯ રને હરાવ્યું હતું અને વરસાદથી ખોરવાયેલી ફાઇનલ બાદ ઉચ્ચ સીડિંગના આધારે પુરુષ ટીમને ગોલ્ડ એનાયત કરવામાં આવ્યો હતો.
જાપાનમાં યોજાનાર આગામી એશિયન ગેમ્સ માટે શ્રેયસ અય્યર (Shreyas Iyer) ને ભારતીય પુરુષ ટીમનો કેપ્ટન બનાવવામાં આવ્યો છે, જ્યારે તિલક વર્મા (Tilak Verma) ને વાઇસ કેપ્ટન તરીકે પસંદ કરવામાં આવ્યા છે. ૧૫ સભ્યોની આ ટીમમાં ઉભરતા યુવા બેટ્સમેન વૈભવ સૂર્યવંશી (Vaibhav Sooryavanshi) નો પણ સમાવેશ કરાયો છે, કારણ કે ભારત આ વખતે પણ બંને ગોલ્ડ મેડલ જાળવી રાખવાના લક્ષ્ય સાથે મેદાનમાં ઉતરશે.
