10 May, 2026 07:56 AM IST | Mumbai | Gujarati Mid-day Correspondent
પાકિસ્તાન ક્રિકેટ ટીમ
યજમાન બંગલાદેશ ગઈ કાલે પાકિસ્તાન સામે પ્રથમ ટેસ્ટ-મૅચના બીજા દિવસે ૪૧૭ રન બનાવીને ઑલઆઉટ થઈ ગયું હતું. ભૂતપૂર્વ કૅપ્ટન મુશફિકુર રહીમની ૭૧ રનની ઇનિંગ્સના જોરે બંગલાદેશ ૪૦૦ પ્લસનો સ્કોર બનાવી શક્યું હતું. પાકિસ્તાન સામે બંગલાદેશનો ટેસ્ટમાં આ હાઇએસ્ટ સ્કોર બની ગયો હતો.
પાકિસ્તાન વતી મોહમ્મદ અબ્બાસે ૯૨ રનમાં પાંચ તથા શાહીન શાહ આફ્રિદીએ ૧૧૩ રનમાં ૩ વિકેટ લીધી હતી. પાકિસ્તાને દિવસના અંત સુધી એક વિકેટે ૧૭૯ રન ફટકારીને મજબૂત શરૂઆત કરી હતી. ઇમામ-ઉલ-હક ૪૫ રન બનાવીને આઉટ થયા બાદ પ્રથમ ટેસ્ટ-મૅચ રમી રહેલા અઝાન અવૈસ ૮૫ રન અને અબ્દુલાહ ફઝલ ૩૭ રન બનાવીને અણનમ રહ્યા હતા. પાકિસ્તાન હજુ બંગલાદેશના સ્કોરથી ૨૩૪ રન પાછળ છે અને એની ૯ વિકેટ બાકી છે.
