મેદાન પર ભારતીય પ્લેયર્સને પાણી પીવડાવીને મેં મારું મોટું ઘર બનાવ્યું છે : પાર્થિવ પટેલ

એક ચૅટ-શોમાં મોટા ભાગે ક્રિકેટ મૅચમાં વૉટરબૉય તરીકે કામ કરવા વિશે રમૂજી કમેન્ટ કરી પાર્થિવ પટેલે

પાર્થિવ પટેલે પોતાનો ડાબો હાથ બતાવીને કપાયેલી આંગળી વિશે ખુલાસો કર્યો હતો

ભારતના ભૂતપૂર્વ ક્રિકેટર પાર્થિવ પટેલે એક ચૅટ-શોમાં મોટા ભાગે ક્રિકેટ મૅચમાં વૉટરબૉય તરીકે કામ કરવા વિશે રમૂજી કમેન્ટ કરી છે. તેણે કહ્યું હતું કે ‘પાણીની વાત ન કરો. મેં ૮૫ વન-ડે મૅચમાં વૉટરબૉયનું કામ કર્યું છે. રાહુલ દ્રવિડ વિકેટકીપિંગ કરતો હતો ત્યારે હું મેદાન પર પ્લેયર્સને પાણી આપવા જતો હતો. મેં ૨૦૦૩ના આખા વર્લ્ડ કપમાં પાણી જ પીવડાવ્યું છે. એ સમયે મેં પાણી પીવડાવીને મોટું ઘર બનાવી લીધું હતું.’

વિકેટકીપર-બૅટર પાર્થિવ પટેલ ભારત માટે પચીસ ટેસ્ટ-મૅચ, ૩૮ વન-ડે અને બે T20 મૅચ રમ્યો છે.

પાંચ વર્ષની ઉંમરે કપાઈ ગઈ હતી આંગળી

પાર્થિવ પટેલની ડાબા હાથની ટચલી આંગળી નથી એ વિશે પણ રસપ્રદ ખુલાસો થયો હતો. તેણે કહ્યું હતું કે ‘હું બાળપણથી જ શાંત નહોતો. હું પાંચ વર્ષનો હતો ત્યારે રમતાં-રમતાં મારી આંગળી દરવાજામાં ફસાઈને કપાઈ ગઈ હતી.’ અમદાવાદમાં જન્મેલો ૪૦ વર્ષનો પાર્થિવ પટેલ હાલમાં ગુજરાત ટાઇટન્સનો સહાયક કોચ છે અને ભારતની મૅચ દરમ્યાન કૉમેન્ટરી પણ કરે છે.