11 February, 2026 09:42 AM IST | Chennai | Gujarati Mid-day Correspondent
ઍલન અને સાઇફર્ટે ગઈ કાલે અણનમ ૧૭૫ રનની પાર્ટનરશિપ કરી હતી
ચેન્નઈમાં ગઈ કાલે ન્યુ ઝીલૅન્ડે ફૉર્મ જાળવી રાખતાં યુનાઇટેડ આરબ એમિરેટ્સ (UAE)ને ૧૦ વિકેટે હરાવીને સતત બીજી જીત નોંધાવી હતી. UAEએ આપેલો ૧૭૪ રનનો ટાર્ગેટ કિવી ટીમે ઓપનરોના દમ પર એક પણ વિકેટ ગુમાવ્યા વિના ૧૫.૨ ઓવરમાં હાંસલ કરી લીધો હતો. પ્રથમ મૅચમાં કિવી ટીમે અફઘાનિસ્તાન સામે પાંચ વિકેટે વિજય મેળવ્યો હતો. આમ સતત બીજી જીત સાથે તેમણે સુપર-એઇટ રાઉન્ડમાં પ્રવેશ કરી લીધો છે.
UAEના કૅપ્ટને ટૉસ જીતીને પહેલાં બૅટિંગનો નિર્ણય લીધો હતો અને મોહમ્મદ વાસીમ (૬૬ રન) અને અલીશાન શરાફુ (પંચાવન રન)ની હાફ-સેન્ચુરીની મદદથી ૨૦ ઓવરમાં ૬ વિકેટે ૧૭૩ રનનો ચૅલેન્જિંગ સ્કોર નોંધાવ્યો હતો. જોકે કિવી ટીમે ઓપનરો ટિમ સાઇફર્ટ (૪૨ બૉલમાં ૩ સિક્સર અને ૧૨ ફોર સાથે અણનમ ૮૯) અને ફિન ઍલન (૫૦ બૉલમાં પાંચ સિક્સર અને પાંચ ફોર સાથે અણનમ ૮૪ રન)એ ચૅલેન્જનો સ્વીકાર કરીને ૧૫.૨ ઓવરમાં ટીમને જીત અપાવી દીધી હતી.
ન્યુ ઝીલૅન્ડ હવે એની છેલ્લી લીગ મૅચ શનિવારે સાઉથ આફ્રિકા સામે અને UAE બીજી મૅચ શુક્રવારે દિલ્હીમાં કૅનેડા સામે રમશે.
કિવી ઓપનરો ઍલન અને સાઇફર્ટની ગઈ કાલની અણનમ ૧૭૫ રનની પાર્ટનરશિપે T20 વર્લ્ડ કપમાં એક નવો ઇતિહાસ રચ્યો હતો. T20 વર્લ્ડ કપમાં તેમની કોઈ પણ વિકેટ માટે, કોઈ પણ ટીમે બનાવેલી હાઇએસ્ટ પાર્ટનરશિપ બની હતી. આ પહેલાંનો ૧૭૦ રનનો રેકૉર્ડ પણ ઓપનિંગ પાર્ટરનશિપનો જ હતો જે ઇંગ્લૅન્ડના ઓપનરો જોસ બટલર અને ઍલેક્સ હેલ્સે ૨૦૨૨ની ૧૦ નવેમ્બરે ઍડીલેડમાં ભારત સામે બનાવ્યો હતો.
