આજથી શરૂ થાય છે ભારત અને વેસ્ટ ઇન્ડીઝ વચ્ચે ત્રણ મૅચની વન-ડે સિરીઝ

૨૦૨૭ના વન-ડે વર્લ્ડ કપની તૈયારી માટે ભારત વેસ્ટ ઇન્ડીઝ સામે ત્રણ મૅચની વન-ડે શ્રેણી રમશે. વિરાટ કોહલી અને રોહિત શર્મા લાંબા સમય બાદ વાપસી કરશે, જ્યારે યુવા ખેલાડીઓને પણ તક મળવાની શક્યતા છે.

પ્રતીકાત્મક તસવીર

ICC વન-ડે વર્લ્ડ કપ 2027ને હવે એકાદ વર્ષનો સમય બાકી છે ત્યારે ભારતીય ટીમે વૈશ્વિક મહાકુંભ માટે પોતાની તૈયારીઓ તેજ કરી દીધી છે અને આ અભિયાનની શરૂઆત આજથી વેસ્ટ ઇન્ડીઝ સામેની ત્રણ મૅચની વન-ડે શ્રેણીથી થશે, જેની પ્રથમ મૅચ તિરુવનંતપુરમના ગ્રીનફીલ્ડ ઇન્ટરનૅશનલ સ્ટેડિયમ ખાતે રમાશે. આ શ્રેણીમાં તમામ ચાહકોની નજર ટીમના વરિષ્ઠ ખેલાડીઓ વિરાટ કોહલી અને રોહિત શર્મા પર રહેશે જેઓ જુલાઈના મધ્યમાં ઇંગ્લૅન્ડ સામેની વન-ડે શ્રેણી બાદ પ્રથમ વખત એકસાથે મેદાન પર વાપસી કરી રહ્યા છે. કોહલી અત્યારે શાનદાર ફૉર્મમાં છે જ્યારે રોહિતે ઇંગ્લૅન્ડ સામેની ત્રીજી વન-ડેમાં સદી ફટકારીને ભારતીય ટીમમાં તેના ભવિષ્યને લઈને ચાલી રહેલી તમામ અટકળો પર વિરામ લગાવી દીધો હતો.
એશિયન ગેમ્સમાં ભારતના મુખ્ય સ્ટાર ખેલાડીઓ સુવર્ણ ચંદ્રકનો બચાવ કરવા ગયા હોવાથી આ શ્રેણીમાં ભારત પાસે બેન્ચ-સ્ટ્રેન્થ અજમાવવાની ઉત્તમ તક રહેશે; જેમાં નીતીશ કુમાર રેડ્ડી, ધ્રુવ જુરેલ, રમનદીપ સિંહ, ગુરનૂર બરાડ અને આકિબ નબી જેવા યુવા ખેલાડીઓ માટે આ મૅચો ખૂબ મહત્ત્વની સાબિત થશે અને કૅપ્ટન શુભમન ગિલ તથા રોહિત શર્માના બૅકઅપ તરીકે સામેલ ત્રીજા ઓપનર યશસ્વી જાયસવાલને કેટલી તક મળે છે એ જોવું પણ રસપ્રદ રહેશે. સામે પક્ષે વેસ્ટ ઇન્ડીઝ માટે આ શ્રેણી આવતા વર્ષે ફેબ્રુઆરીમાં યોજાનારી વર્લ્ડ કપ ક્વૉલિફાયર માટે મજબૂત તૈયારી સમાન છે, કારણ કે કૅરિબિયન ટીમ ૨૦૨૭ના વર્લ્ડ કપ માટે સીધી ક્વૉલિફાય થઈ શકી નથી અને ૨૦૨૩ની જેમ ફરી એક વખત વર્લ્ડ કપ મિસ કરવાની શરમથી બચવા માટે તેમણે લાંબા ક્વૉલિફિકેશન રૂટમાંથી પસાર થવું પડશે.
આ રોમાંચક શ્રેણીની બીજી મૅચ બુધવારે ગુવાહાટીમાં અને ત્રીજી તથા અંતિમ મૅચ ત્રીજી ઑક્ટોબરે ન્યુ ચંડીગઢમાં રમાશે. આ ત્રણેય મૅચ બપોરે ૧.૩૦ વાગ્યાથી શરૂ થશે જેનું સીધું પ્રસારણ સ્ટાર સ્પોર્ટ્‍સ નેટવર્ક પર અને લાઇવ સ્ટ્રીમિંગ જિયોહૉટસ્ટાર ઍપ અને વેબસાઇટ પર ઉપલબ્ધ રહેશે.