09 June, 2026 11:26 AM IST | Mumbai | Gujarati Mid-day Correspondent
પહેલી જ મૅચમાં ધમાલ મચાવી પ્લેયર ઑફ ધ મૅચ અવૉર્ડ જીત્યો માનવ સુથાર
રાજસ્થાનના ૨૩ વર્ષના ડાબોડી સ્પિનર માનવ સુથારે ભારત માટેની ડેબ્યુ ટેસ્ટ મૅચમાં ૭ વિકેટ લઈને યાદગાર પ્રદર્શન કર્યું હતું. તે ૨૧મી સદીમાં ડેબ્યુ-ટેસ્ટની પહેલી જ ઇનિંગ્સમાં ભારત માટે સૌથી સારી બોલિંગ કરનાર બોલર બન્યો હતો.
માનવ સુથાર ટેસ્ટ-ડેબ્યુ પર પાંચ પ્લસ વિકેટ લેનાર ભારતનો સાતમો સ્પિનર અને દસમો ઓવરઑલ બોલર બન્યો હતો. છેલ્લે સ્પિનર અક્ષર પટેલે ભારત માટે ટેસ્ટ-ડેબ્યુ પર પાંચ વિકેટ લીધી હતી. માનવ સુથાર પહેલી ટેસ્ટ-મૅચની પહેલી ઓવરમાં ઓછામાં ઓછી એક વિકેટ લેનાર ભારતનો આઠમો બોલર પણ બન્યો હતો. માનવ સુથાર નવમો ભારતીય બન્યો છે જેણે ભારત માટે પહેલી ટેસ્ટ-મૅચમાં પ્લેયર ઑફ ધ મૅચ અવૉર્ડ જીત્યો હોય. રવિચન્દ્રન અશ્વિન (વર્ષ ૨૦૧૧) બાદ તે ભારતનો માત્ર બીજો સ્પિનર છે જેણે ડેબ્યુ મૅચમાં આ અવૉર્ડ જીત્યો છે.
માનવ સુથાર ગુજરાત ટાઇટન્સનો ભાગ હોવાથી શુભમન ગિલે તેને ટેસ્ટ-ટીમમાં સામેલ કર્યો એવી વાતો ચર્ચામાં છે. જોકે ૨૦૨૩ના વન-ડે વર્લ્ડ કપ અને ૨૦૨૪ના T20 વર્લ્ડ કપ સહિતની મોટી ઇવેન્ટમાં તે ભારત માટે નેટ બોલરની ભૂમિકા ભજવી ચૂક્યો છે. ડોમેસ્ટિકની ઑફ-સીઝન હોય છે ત્યારે તે ઘરની પાસેના મેદાનમાં એક સ્ટમ્પ લગાડીને ૩૦થી ૪૦ ઓવર સ્પિન બોલિંગની પ્રૅક્ટિસ કરે છે. ચાલુ સીઝનમાં પણ તે આ ક્રમ જાળવી રાખે છે.
માનવ સુથારે ૩૦ ફર્સ્ટ-ક્લાસ મૅચોમાં ૧૩૬ વિકેટ અને લિસ્ટ A ક્રિકેટમાં ૩૪ વધુ વિકેટો લીધી છે. અગાઉ તેણે તેની અન્ડર-૧૯ની એકમાત્ર ટેસ્ટ-મૅચમાં ૪ વિકેટ અને અન્ડર-૧૯ની ત્રણ વન-ડે મૅચમાં ૧૦ વિકેટ લીધી હતી. ગુજરાત ટાઇટન્સ સાથેની પાંચ મૅચ સહિત ૨૯ T20 મૅચમાં તે પચીસ વિકેટ લઈ ચૂક્યો છે. ઇન્ડિયા A સામે તમામ ફૉર્મેટની ૧૦ મૅચોમાં ૨૭ વિકેટ લઈ ચૂક્યો છે.
ભારત માટે ડેબ્યુ ટેસ્ટની પહેલી ઇનિંગ્સના શ્રેષ્ઠ બોલિંગ આંકડા
વર્ષ ૧૯૮૮માં નરેન્દ્ર હિરવાણી વેસ્ટ ઇન્ડીઝ સામે - ૮/૬૧
વર્ષ ૨૦૨૬માં માનવ સુથાર અફઘાનિસ્તાન સામે - ૬/૩૩
વર્ષ ૧૯૬૭માં આબિદ અલી ઑસ્ટ્રેલિયા સામે - ૬/૫૫
વર્ષ ૧૯૭૯માં દિલીપ દોશી ઑસ્ટ્રેલિયા સામે - ૬/૧૦૩
વર્ષ ૧૯૬૧માં વામન કુમાર પાકિસ્તાન સામે - ૫/૬૪
