14 March, 2026 05:07 PM IST | Mumbai | Gujarati Mid-day Correspondent
સલમાન અલી આગાની મૂર્ખામીથી પાકિસ્તાન ક્રિકેટ બની મજાક
ગઈ કાલે ઢાકામાં બંગલાદેશ સામેની બીજી વન-ડે મૅચમાં સલમાન અલી આગા એવી રીતે રનઆઉટ થયો કે આખા ક્રિકેટજગતમાં તેની અને પાકિસ્તાન ક્રિકેટ વિશે મજાક થઈ. સ્પિનર અને કૅપ્ટન મેહદી હસન મિરાઝની ૩૯મી ઓવરમાં સલમાન અલી આગા નૉન-સ્ટ્રાઇકર એન્ડ પર પોતાની મૂર્ખામીને લીધે રનઆઉટ થયો હતો.
મોહમ્મદ રિઝવાને ડિફેન્સિવ શૉટ રમ્યો ત્યારે બૉલ ક્રીઝની બહાર રન દોડવા આવેલા સલમાન અલી આગા પાસે આવ્યો ત્યારે મિરાઝ ઝડપથી તેની નજીક પહોંચ્યો. આ સમયે ફરી ક્રીઝમાં પાછા આવવાને બદલે સલમાન અલી આગા બૉલ ઉપાડવાનો પ્રયાસ કરતો જોવા મળ્યો. જોકે મિરાઝે બૉલ પહેલાં ઉપાડીને થ્રો કરીને સલમાન અલી આગાને રનઆઉટ કર્યો હતો. આ રનઆઉટ બાદ સલમાન અલી આગા પોતાની ભૂલ સ્વીકારવાને બદલે બંગલાદેશી પ્લેયર્સ સાથે રકઝક કરતો જોવા મળ્યો હતો.
૪૪ રન કરનાર મોહમ્મદ રિઝવાન અને ૬૪ રન કરનાર સલમાન અલી આગાએ ચોથી વિકેટ માટે ૧૧૫ બૉલમાં ૧૦૯ રનની ભાગીદારી કરીને પાકિસ્તાનને સન્માનજનક સ્કોર સુધી પહોંચાડ્યું હતું. પાકિસ્તાન ૪૭.૩ ઓવરમાં ૨૭૪ રનના સ્કોર પર ઑલઆઉટ થયું હતું.
