અક્ષય કુમારે બોરીવલીના બે ફ્લૅટ વેચીને નફો ઘેરભેગો કર્યો

એક ડીલમાં ૮૯ ટકા જેટલો અને બીજીમાં ૮૬ ટકા જેટલો ફાયદો

અક્ષય કુમાર

અક્ષય કુમારે મુંબઈમાંના પોતાના બે અપાર્ટમેન્ટ્સ ૬.૬ કરોડ રૂપિયામાં વેચી દીધા છે. આ ડીલમાં અક્ષયને કરોડો રૂપિયાનો ફાયદો થયો છે. રિયલ્ટી પ્લૅટફૉર્મ ‘સ્ક્વેર યાર્ડ્સ’ દ્વારા આપવામાં આવેલી માહિતી પ્રમાણે અક્ષય કુમારે બોરીવલીની ઑબેરૉય સ્કાય સિટીમાં પોતાના બે અપાર્ટમેન્ટ વેચી નાખ્યા છે. આ ડીલનું રજિસ્ટ્રેશન માર્ચમાં થયું છે. 

મળતી માહિતી પ્રમાણે અક્ષયે બેમાંથી એક અપાર્ટમેન્ટ ૫.૩૫ કરોડ રૂપિયામાં વેચ્યો છે. તેણે આ અપાર્ટમેન્ટ ૨૦૧૭માં ૨.૮૨ કરોડમાં ખરીદ્યો હતો. આ અપાર્ટમેન્ટ વેચવાથી તેને ૮૯ ટકા (૨.૫૩ કરોડ રૂપિયા)નો નફો થયો છે. આ અપાર્ટમેન્ટનો કાર્પેટ એરિયા ૧૦૮૦ વર્ગફુટ છે. આ અપાર્ટમેન્ટની ડીલ માટે ૩૨.૧ લાખ રૂપિયાની સ્ટૅમ્પ-ડ્યુટી અને ૩૦,૦૦૦ રૂપિયાનો રજિસ્ટ્રેશન-ચાર્જ થયો હતો.

અક્ષયે ઑબેરૉય સ્કાય સિટીમાં પોતાનો બીજો અપાર્ટમેન્ટ ૧.૨૫ કરોડ રૂપિયામાં વેચ્યો છે. તેણે આ અપાર્ટમેન્ટ પણ ૨૦૧૭માં ૬૭.૧૯ લાખ રૂપિયામાં ખરીદ્યો હતો. એ વેચાણથી તેને ૮૬ ટકા (૫૭.૮૧ લાખ રૂપિયા)નો નફો થયો છે. આ અપાર્ટમેન્ટનો કાર્પેટ એરિયા ૨૫૨ વર્ગફુટ છે. આ અપાર્ટમેન્ટની ડીલ માટે ૭.૫ લાખની સ્ટૅમ્પ-ડ્યુટી અને ૩૦,૦૦૦ રૂપિયા રજિસ્ટ્રેશન-ચાર્જ લાગ્યો હતો.