ટ્રાન્સમીડિયા એવૉર્ડના ૨૧મા વર્ષના ગુજરાતી ફિલ્મો-નાટકોના નૉમિનેશન જાહેર, જુઓ લિસ્ટ

મુંબઈ અને ગુજરાતમાં વર્ષ દરમિયાન રિલીઝ થયેલા મોટાભાગના નાટકોને પણ એન્ટ્રી મળી

તસવીરો: આયોજક ટીમ

છેલ્લા ૨૦ વર્ષથી મુંબઈની ધરતી પર દબદબાભેર યોજાતા વિશ્વના સૌથી મોટા અને સૌથી જૂના ટ્રાન્સમીડિયા એવૉર્ડની ટીમ દ્વારા ૨૧મા વાર્ષિક ટ્રાન્સમીડિયા ગુજરાતી સ્ક્રીન અને સ્ટેજ એવૉર્ડ ૨૦૨૩ (21^st Transmedia Award)ના ગુજરાતી ફિલ્મો તથા મુંબઈ અને ગુજરાતના નાટકોના નૉમિનેશન આજે જાહેર કરવામાં આવ્યા છે.

આયોજકો દ્વારા તારીખ ૧ જાન્યુઆરી ૨૦૨૩થી તારીખ ૩૧ ડિસેમ્બર ૨૦૨૩ વચ્ચે સિનેમા અને ઓટીટી પર રિલીઝ થયેલી ગુજરાતી ફિલ્મો તથા ગુજરાત અને મુંબઈના નાટકોની એન્ટ્રી મગાવવામાં આવી હતી. આ વર્ષે કુલ ૪૨ જેટલી ગુજરાતી ફિલ્મો સિનેમાઘરોમાં રિલીઝ થઈ હતી તથા ૨ ગુજરાતી ફિલ્મો ઓટીટી પ્લેટફોર્મ રિલીઝ થઈ હતી, જેમને અધીકૃત એન્ટ્રી મળી હતી. આ મુજબ મુંબઈ અને ગુજરાતમાં વર્ષ દરમિયાન રિલીઝ થયેલા મોટાભાગના નાટકોને પણ એન્ટ્રી (21^st Transmedia Award) મળી હતી.

તટસ્થ જ્યુરી દ્વારા કુલ ૪૨ ફિલ્મો તથા બે ઓટીટીની ફિલ્મોનું ચોકસાઈપૂર્વક સ્ક્રીનિંગ કરી વિધિવત રીતે નૉમિનેશન જાહેર કરવામાં આવ્યા છે. કુલ ૪૨ ફિલ્મોમાંથી ૨૦ + ૨ એમ કુલ ૨૨ ફિલ્મોને અલગ-અલગ સંખ્યામાં નૉમિનેશન મળ્યા છે. સૌથી વધુ ૧૪ જેટલા નૉમિનેશન સાથે સૌલસુત્ર પ્રોડક્શનની ફિલ્મ `કચ્છ એક્સપ્રેસ` સૌથી આગળ છે. જ્યારે ૯ નૉમિનેશન સાથે `હું ઇકબાલ`, `શુભ યાત્રા` અને `હું અને તું` બીજા નંબર પર છે.

આ ઉપરાંત ૮ નૉમિનેશન સાથે `લકીરો`, ૬ નૉમિનેશન સાથે `કર્મ`, `મીરા` તથા `બચુભાઈ`,  ૫ નૉમિનેશન સાથે `ચલ મન જીતવા-૨`, ૪ નૉમિનેશન સાથે `હરી ઓમ હરી` તથા `હેલ્લો`, ૩ નૉમિનેશન સાથે `આગંતુક` અને `સરપંચ`, ૨ નૉમિનેશન સાથે `વેલકમ પુર્ણિમા` અને `કોગ્રેચ્યુલેશન્સ` અને ૧ નૉમિનેશન સાથે `જય શ્રી ક્રિષ`, `ચાર ફેરાનું ચકડોળ`, `વર પધરાવો સાવધાન`, `પોપટ` અને `કહી દેને પ્રેમ છે` સ્પર્ધામાં છે.

ટ્રાન્સમીડિયાની પ્રણાલી મુજબ આ વર્ષે ગુજરાતી ફિલ્મ, ટેલિવિઝનના ખૂબ જ સિનિયર કલાકાર અનંગ દેસાઈ તથા `સાસ ભી કભી‌ બહુ થી`ના બા એટલે કે લીલી પટેલને લાઇફ ટાઇમ એચિવમેન્ટ એવૉર્ડથી નવાજવાનું નક્કી કરવામાં આવ્યું છે. પ્રતિ વર્ષ અપાતો સ્વ. ગોવિંદભાઈ પટેલ મહારથી એવૉર્ડ આ વર્ષે બોલિવૂડના જાણીતા કલાકાર શર્મન જોષીને આપવાનું નક્કી કરવામાં આવ્યું છે. જ્યારે સંગીત બેલડી સ્વ. મહેશ - સ્વ. નરેશના નામથી અપાતો મહેશ - નરેશ એવૉર્ડ આ વર્ષે યુવા સંગીતકારો સંજીવ - દર્શનને આપવાનું નક્કી કરવામાં આવ્યું છે.

વર્ષ ૨૦૨૩માં રિલીઝ થયેલી બોલિવૂડના જાણીતા દિગ્દર્શક રાજકુમાર સંતોષી દિગ્દર્શિત હિન્દી ફિલ્મ ‘ગાંધી – ગોડસે’માં ગાંધીજીનું પાત્ર આબેહૂબ ભજવનાર ટ્રાન્સમીડિયા પરિવારના જ સદસ્ય એવા દિપક અંતાણીને ટ્રાન્સમીડિયા વિશેષ એવૉર્ડથી સન્માનિત કરવામાં આવશે.

જુઓ નૉમિનેટ થયેલા ગુજરાતી નાટકો અને ગુજરાતી ફિલ્મોની સંપૂર્ણ યાદી

આગામી ૨૪ ફેબ્રુઆરીએ મુંબઈ ખાતે ખાસ આમંત્રિતોની ઉપસ્થિતિમાં યોજાનાર આ ભવ્ય સમારંભ માટે ટ્રાન્સમીડિયાના સી.એમ.ડી. જસ્મીન શાહના નેતૃત્વ હેઠળ રાજુ સાવલા, અભિલાષ ઘોડા, દિપક અંતાણી, વિજય રાવલ ફરી એકવાર આ ઇવેન્ટને સફળ બનાવવા સંપૂર્ણ કટીબદ્ધ છે.