સાહિલ વાકોડેના માતા-પિતા સાથે રાહુલ ગાંધીએ વીડિયો કોલ પર કરી વાત, ન્યાયની લડતમાં આપશે સાથ

Sahil Wakode Death Case: કોંગ્રેસ નેતા રાહુલ ગાંધીએ આત્મહત્યા કરનાર IIT બોમ્બેના વિદ્યાર્થી સાહિલ વાકોડેના માતા-પિતા સાથે વીડિયો કોલ દ્વારા વાતચીત કરી હતી અને ન્યાય મેળવવાની તેમની લડતમાં પક્ષ તરફથી સંપૂર્ણ સમર્થન અને મદદની ખાતરી આપી

રાહુલ ગાંધીની ફાઇલ તસવીર

લોકસભા (Loksabha)માં વિરોધ પક્ષના નેતા રાહુલ ગાંધી (Rahul Gandhi)એ ગુરુવારે આત્મહત્યા કરનાર ઇન્ડિયન ઇન્સ્ટિટ્યૂટ ઓફ ટેક્નોલોજી (Indian Institute of Technology) બોમ્બેના ૨૦ વર્ષીય વિદ્યાર્થી સાહિલ વાકોડે (Sahil Wakode)ના માતા-પિતા સાથે વીડિયો કોલ દ્વારા વાતચીત કરી હતી. તેમણે પોતાના પુત્ર માટે ન્યાય મેળવવાની આ લડાઈમાં પરિવારને શક્ય તમામ મદદ અને સમર્થન આપવાની ખાતરી આપી હતી. બીજી તરફ, આઇઆઇટી બોમ્બે (IIT Bombay)ના મુખ્ય ગેટ બહાર પરિવાર દ્વારા અનિશ્ચિત મુદતના ઉપવાસ આંદોલનની જાહેરાત બાદ કેમ્પસમાં તણાવ વધી ગયો છે.

મુંબઈ પ્રવાસ દરમિયાન ૧૭ મિનિટ કરી વાતચીત

કોંગ્રેસ (Congress) પક્ષના સૂત્રોના જણાવ્યા અનુસાર, રાહુલ ગાંધીએ સાહિલના પિતા રવિન્દ્ર વાકોડે અને માતા સોનાલી વાકોડે સાથે મહારાષ્ટ્ર (Maharashtra)ના વાશિમ (Washim) જિલ્લામાંથી મુંબઈ (Mumbai) તરફ મુસાફરી કરી રહ્યા હતા ત્યારે આશરે ૧૭ મિનિટ સુધી વીડિયો કોલ પર ચર્ચા કરી હતી. આ વાતચીત દરમિયાન ભારતીય યુથ કોંગ્રેસના પ્રમુખ ઉદય ભાનુ ચિબ (Indian Youth Congress president Uday Bhanu Chib) અને મહારાષ્ટ્ર યુનિટના વડા શિવરાજ મોરે (Shivraj More) પણ પરિવારની સાથે ઉપસ્થિત રહ્યા હતા.

વીડિયો કોલ દરમિયાન રાહુલ ગાંધીએ પીડિત પરિવાર (Sahil Wakode Death Case) પ્રત્યે સંવેદના વ્યક્ત કરી હતી અને ભારપૂર્વક જણાવ્યું હતું કે, બીજા વર્ષના BTech વિદ્યાર્થીના મોત પાછળના સંજોગોની નિષ્પક્ષ અને ન્યાયી તપાસની માંગમાં તેઓ પરિવારની સાથે મજબૂતીથી ઊભા છે.

પરિવારે કરી ધરપકડની માંગ, અનિશ્ચિત મુદતના ઉપવાસ શરૂ

રાહુલ ગાંધી સાથેની આ વાતચીત તે જ સમયે થઈ જ્યારે સાહિલનો પરિવાર IIT બોમ્બેના મુખ્ય ગેટ સામે અનિશ્ચિત મુદતના ઉપવાસ આંદોલન શરૂ કરવા મુંબઈ પહોંચ્યો હતો. માતા-પિતાએ સંસ્થાકીય ઉત્પીડન અને જ્ઞાતિ આધારિત ભેદભાવનો આરોપ લગાવીને પોલીસ ફરિયાદમાં નામાંકિત ફેકલ્ટી સભ્યોની તાત્કાલિક ધરપકડ કરવાની માંગ કરી છે.

મુંબઈ પોલીસ ક્રાઈમ બ્રાન્ચ હાલમાં આત્મહત્યાની દુષ્પ્રેરણા અને SC/ST (અત્યાચાર નિવારણ) અધિનિયમ હેઠળ કેસની તપાસ કરી રહી છે.

આ ઘટના ૧૮ સપ્ટેમ્બરની સાંજે બની હતી, જ્યારે સાહિલ મિડ-સેમેસ્ટર પરીક્ષા દરમિયાન ChatGPT એક્સેસ કરવા માટે મોબાઈલ ફોનનો ઉપયોગ કરતા પકડાયો હતો અને ત્યારબાદ તેને પરીક્ષા હોલમાંથી બહાર કાઢવામાં આવ્યો હતો.

ક્રાઈમ બ્રાન્ચની તપાસ વચ્ચે વહીવટી પગલાં લેવાયા

વધતા વિરોધ પ્રદર્શનને ધ્યાનમાં રાખીને, IIT બોમ્બે બોર્ડ ઓફ ગવર્નર્સે FIR માં નામાંકિત પ્રોફેસર સૂર્યનારાયણ દૂલ્લા (Prof. Suryanarayana Doolla)ને નિષ્પક્ષ તપાસ સુનિશ્ચિત કરવા માટે રજા પર ઉતરી જવાનો નિર્દેશ આપ્યો હતો. તદુપરાંત, સંસ્થાએ પ્રોફેસર રમેશ વેંકટેશ્વરનના નેતૃત્વમાં ૧૦ સભ્યોની ઉચ્ચ સ્તરીય તપાસ સમિતિની રચના કરી છે, જે એક અઠવાડિયાની અંદર તેનો વ્યાપક તપાસ અહેવાલ સોંપશે.

ક્રાઈમ બ્રાન્ચ પરીક્ષા હોલ અને હોસ્ટેલ પરિસરના સીસીટીવી ફૂટેજની તપાસ કરી રહી છે, ત્યારે બીજી તરફ વિવિધ રાજકીય અને વિદ્યાર્થી સંગઠનોએ ઉચ્ચ શિક્ષણ સંસ્થાનોમાં જવાબદેહી સુનિશ્ચિત કરવા માટે આંદોલન તેજ કર્યું છે.