પિતા-પુત્રએ લાઇસન્સ વિવાદમાં ટ્રાફિક પોલીસને ઢોર માર માર્યો, વીડિયો વાયરલ

પુત્ર લાઇસન્સ વિના વાહન ચલાવતો પકડાયા બાદ પિતા અને પુત્રની જોડીએ નાલાસોપારામાં બે ટ્રાફિક પોલીસ અધિકારીઓ પર હુમલો કર્યો હોવાનો આરોપ છે.

 

આ ઘટના આજે સવારે ૧૦ વાગ્યાની આસપાસ નાલાસોપારા પૂર્વના નગીનદાસ પાડા સ્થિત સિતારા બેકરીની સામે બની હતી. આ સમગ્ર ઝઘડાને ત્યાં હાજર લોકોએ મોબાઇલ ફોનમાં રેકોર્ડ કરી લીધો હતો.

 

પોલીસ અધિકારીઓના જણાવ્યા મુજબ, ટ્રાફિક કર્મચારીઓએ એક વ્યક્તિને લાઇસન્સ વિના વાહન ચલાવવા બદલ અટકાવ્યો. ત્યારબાદ તેણે તેના પિતાને સ્થળ પર બોલાવ્યો, અને બંનેએ સાથે મળીને પોલીસ અધિકારીઓ પર હુમલો કર્યો. અહેવાલ મુજબ, બંનેએ અધિકારીઓને જમીન પર ધકેલી દીધા અને વારંવાર લાતો મારી. પિતાની ઓળખ મંગેશ નારકર અને તેના પુત્ર પાર્થ નારકર તરીકે થઈ હતી.

 

આ અધિકારીઓની ઓળખ પોલીસ કોન્સ્ટેબલ હનુમંત સાંગલે અને કોન્સ્ટેબલ શેષનારાયણ અથારે તરીકે થઈ છે. વસઈ સ્થિત તુલીંજ પોલીસે આ ઘટના સંદર્ભે એફઆઈઆર નોંધવાની પ્રક્રિયા શરૂ કરી દીધી છે.

તાજેતરમાં, રાજ્યના ડેપ્યુટી ચીફ મિનિસ્ટર અને પુણેના પાલક પ્રધાન અજિત પવાર હિંજવડી પહોંચી ગયા હતા અને રસ્તા પર ઊતરીને અને લોકોની સમસ્યાઓ જાણીને એનો ઉકેલ લાવવાના પ્રયાસ કર્યા હતા. પુણેનો હિંજવડી વિસ્તાર આઇટી પાર્ક તરીકે ડેવલપ થઈ ગયો છે. અનેક આઇટી કંપનીઓની ઑફિસો અહીં આવેલી છે અને એ કંપનીઓમાં કામ કરતા હજારો કર્મચારીઓની અહીં રોજની અવરજવર રહે છે એટલે ટ્રાફિક જૅમ સમસ્યા છે. બીજું, હાલ પરિસ્થિ​તિ એવી છે કે જો અહીં ફક્ત ૧૦ મિનિટ વરસાદ પડે તો પણ પાણી ભરાઈ જાય છે. આ સીઝનમાં પહેલા વરસાદમાં જ પાણી ભરાઈ ગયાં હતાં અને પુણે મહાનગર પરિવહન મહામંડળ લિમિટેડ (PMPMl)ની બસ ભરાયેલા પાણીમાં પસાર થતી હોવાનો વિડિયો વાઇરલ થયો હતો. અજિત પવારે રોડની બન્ને સાઇડ થયેલાં અતિક્રમણો જોયાં હતાં. એ પછી તેમણે પુણે મ્યુનિસિપલ કૉર્પોરેશનના રોડ ડિપાર્ટમેન્ટ અને સંબંધિત અધિકારીઓને સૂચના આપતાં કહ્યું હતું કે સરકારી રસ્તો રોકનારા લોકો પર સરકારી કામમાં રુકાવટ લાવવા બદલ ગુનો નોંધીને કાર્યવાહી કરવામાં આવે અને જો રોડ-વાઇડનિંગમાં અધિકૃત લોકોની જગ્યા કપાતી હોય તો તેમને વળતર આપવામાં આવે. પાણી ભરાવાની સમસ્યા બદલ માહિતી આપતાં સ્થાનિક લોકોએ અજિત પવારને કહ્યું હતું કે ‘વરસાદનું પાણી જેમાં વહી જતું હતું એ નાળું બે મોટા પ્રોજેક્ટ બન્યા એમાં કંપનીએ પૂરીને જગ્યા કવર કરી નાખી છે એટલે હવે વરસાદનું પાણી વહી જવાની જગ્યા જ નથી રહી એટલે એ રોડ પર પાણી ભરાઈ જાય છે. એને કારણે લોકોને અને વાહનચાલકોને હાડમારીનો સામનો કરવો પડે છે.’