19 May, 2025 04:58 PM IST | New Delhi | Gujarati Mid-day Online Correspondent
જ્યોતિ મલ્હોત્રા
શાંત અને સામાન્ય જીવન જીવતી હિસારની જ્યોતિ મલ્હોત્રા અચાનક રાજદ્રોહના આરોપમાં ચર્ચામાં આવી ગઈ છે. હિસારના આ યુટ્યુબર પર પાકિસ્તાની નાગરિકના સંપર્કમાં રહેવાનો અને સતત સંવેદનશીલ માહિતી શૅર કરવાનો આરોપ છે. આ સનસનાટીભર્યા ખુલાસા બાદ સુરક્ષા એજન્સીઓ પણ સતર્ક થઈ ગઈ છે. જ્યારે પોલીસે જ્યોતિને કસ્ટડીમાં લીધી અને તપાસ શરૂ કરી, ત્યારે પરિવારના સભ્યો પણ ચોંકી ગયા. જ્યોતિના પિતાએ તેના પાકિસ્તાની કનેક્શન વિશે વાતચીતમાં શું કહ્યું તે જાણો
આ સમગ્ર મામલામાં જ્યોતિના પિતા હરીશ મલ્હોત્રાનું નિવેદન સૌથી વધુ ભાવનાત્મક છે. ANI સાથે વાત કરતાં તેમણે કહ્યું, "મને કંઈ ખબર નહોતી. તે કહેતી હતી કે તે દિલ્હી જઈ રહી છે. તે ક્યારેય કોઈ મિત્રને ઘરે લાવી નથી. ગઈકાલે પોલીસ આવી, તેના કપડાં લઈ ગઈ, પણ તે કંઈ બોલ્યા નહીં... હું શું કહું?"
જ્યોતિના પિતાએ પાકિસ્તાન કનેક્શન વિશે શું કહ્યું?
જ્યોતિના પાકિસ્તાન પ્રવાસ અને જાસૂસીના પ્રશ્ન પર હરીશે કહ્યું, "શું મેં ક્યારેય જ્યોતિના પાકિસ્તાન કનેક્શન અથવા પાકિસ્તાન જવા વિશે કંઈ કહ્યું છે? મને આ વિશે કંઈ ખબર નથી. મને તેની ગતિવિધિઓ વિશે કંઈ ખબર નહોતી. તે કોના સંપર્કમાં છે તે પણ મને ખબર નહોતી. જ્યોતિ ઘરે વીડિયો બનાવતી હતી. તેના કોઈ મિત્ર ક્યારેય અમારા ઘરે આવ્યા નહોતા. તેણે અમને ક્યારેય પાકિસ્તાન જવા વિશે કંઈ કહ્યું નહોતું."
પોલીસ તેને ઘરે લઈ આવી
હરીશે આગળ કહ્યું, "ગઈકાલે પોલીસ જ્યોતિને લઈને ઘરે આવી. તેઓ ઘરમાંથી તેનું લૅપટૅપ અને અન્ય સામાન લઈને ચાલ્યા ગયા. તેઓ લગભગ 15 મિનિટ રોકાયા હશે. જ્યોતિએ પોતાની સાથે કેટલાક કપડાં પણ લઈને ગઈ હતી. તેણે મને ક્યારેય કહ્યું નહીં કે તે કાશ્મીર કે પાકિસ્તાન જઈ રહી છે, તે ફક્ત એટલું જ કહેતી કે તે દિલ્હી જઈ રહી છે. હું પણ ખૂબ ચિંતિત છું, મને સમજાતું નથી કે શું કરવું."
તપાસ એજન્સીઓના શંકાનું શું છે કારણ?
અહેવાલો અનુસાર, જ્યોતિ પાકિસ્તાનના એક વ્યક્તિ સાથે સતત સંપર્કમાં હતી. તે સંવેદનશીલ માહિતી શૅર કરી રહી હતી જે રાષ્ટ્રીય સુરક્ષા માટે ખતરો બની શકે છે. પ્રાથમિક તપાસ દરમિયાન, તેના ડિજિટલ ડિવાઇસીઝમાં થી ઘણી શંકાસ્પદ ચેટ્સ અને ફાઇલો મળી આવી છે.
જ્યોતિ મલ્હોત્રા કેસમાં નવા ખુલાસા
જ્યોતિ મલ્હોત્રા વિશે દરરોજ નવા રહસ્યો ખુલી રહ્યા છે. પાકિસ્તાન માટે જાસૂસી કરવાના આરોપમાં યુટ્યુબર જ્યોતિ મલ્હોત્રાની ચાલી રહેલી તપાસમાં એક નવો ટ્વિસ્ટ આવ્યો છે. હવે એવું બહાર આવ્યું છે કે યુટ્યુબર જ્યોતિ મલ્હોત્રા પહલગામ હુમલા પહેલા પાકિસ્તાન ગઈ હતી. એટલું જ નહીં, આતંકવાદી હુમલા પહેલા તે પહલગામ પણ ગઈ હતી. એવું પણ બહાર આવ્યું છે કે જ્યોતિ મલ્હોત્રાએ ચીનની મુલાકાત પણ લીધી હતી. તપાસમાં જાણવા મળ્યું છે કે જ્યોતિ મલ્હોત્રા આ વર્ષે એપ્રિલમાં પહલગામ હુમલાના ત્રણ મહિના પહેલા પાકિસ્તાન ગઈ હતી. આ ઉપરાંત, જ્યોતિને પાકિસ્તાની હાઈ કમિશનના કર્મચારી દાનિશે હની ટ્રૅપમાં ફસાવી હતી. દાનિશ પાકિસ્તાનની ગુપ્તચર એજન્સી ઇન્ટર-સર્વિસિસ ઇન્ટેલિજન્સ (Inter-Services Intelligence) સાથે સંકળાયેલો હોવાનું માનવામાં આવે છે.
હુમલા પહેલા પહલગામ કેમ ગઈ હતી?
પાકિસ્તાની ગુપ્તચર એજન્સી ISI ને સંવેદનશીલ માહિતી આપવાના આરોપસર યુટ્યુબર જ્યોતિની ધરપકડ કરવામાં આવી છે. જમ્મુ અને કાશ્મીરના ભૂતપૂર્વ પોલીસ મહાનિર્દેશક (DGP) શેષ પૉલ વૈદ્યના ખુલાસાએ ખળભળાટ મચાવી દીધો છે. તેમણે X પર લખ્યું, ‘શું આ માત્ર એક સંયોગ છે કે યુટ્યુબર જ્યોતિ મલ્હોત્રા, જેને પાકિસ્તાની હાઈ કમિશનના કર્મચારી (કદાચ ISI એજન્ટ) દાનિશ દ્વારા હની ટ્રૅપમાં ફસાવી દેવામાં આવી હતી, તે જાન્યુઆરી 2025માં પહલગામ ગઈ હતી? એવું કહેવામાં આવી રહ્યું છે કે તે ISI હેન્ડલર્સને સંવેદનશીલ માહિતી આપી રહી હતી. તેમણે વધુમાં કહ્યું, `આપણી ગુપ્તચર એજન્સીઓ સામાન્ય રીતે એવા લોકો પર નજર રાખે છે જેઓ વારંવાર દુશ્મન દેશો અથવા પાકિસ્તાન, ચીન અને હવે બાંગ્લાદેશ જેવા ઉચ્ચ કમિશનની મુલાકાત લે છે.`
હિસારના એસપી શશાંક કુમાર સાવને જણાવ્યું હતું કે પહલગામ હુમલા પહેલા યુટ્યુબર જ્યોતિ મલ્હોત્રા પાકિસ્તાન ગઈ હતી અને ચીનની મુલાકાત પણ લીધી હતી. તેમના મતે, પાકિસ્તાની ગુપ્તચર એજન્સીઓ જ્યોતિને પાકિસ્તાની એજન્ટ બનવા માટે તૈયાર કરી રહ્યા હતા. તેમણે ખુલાસો કર્યો કે જ્યોતિ મલ્હોત્રા ઘણી વખત પાકિસ્તાન ગઈ હતી. આમાં પહલગામ આતંકવાદી હુમલા પહેલાની મુલાકાતનો પણ સમાવેશ થાય છે. આ ઉપરાંત, તેણે ચીનની મુલાકાત પણ લીધી છે. ચીનની મુલાકાતનો હેતુ હજુ સુધી જાણી શકાયો નથી.
જ્યોતિની આવકનો સોર્સ શું છે?
એસપી સાવનના જણાવ્યા અનુસાર, `હરિયાણા પોલીસ કેન્દ્રીય એજન્સીઓ સાથે સંકલનમાં જ્યોતિ મલ્હોત્રાની પૂછપરછ કરી રહી છે. અમે તેની આવકના સ્ત્રોત શોધવા માટે તેના નાણાકીય વ્યવહારો અને ટ્રાવેલ હિસ્ટરીનું વિશ્લેષણ કરી રહ્યા છીએ. તેની આવકના સ્ત્રોતો તેની વિદેશ યાત્રા સાથે મેળ ખાતા નથી. અમને એવું લાગી રહ્યું છે કે તેને બહારથી ફંડિંગ મળે છે. તે ફક્ત નામની ટ્રાવેલ બ્લોગર હતી.` એસપીએ પુષ્ટિ આપી કે જ્યોતિ મલ્હોત્રાનો પીઆઈઓ સાથે સીધો સંપર્ક હતો.
ઓડિશા પોલીસે શું કહ્યું?
પોલીસને જાણવા મળ્યું કે હરિયાણાના હિસારની રહેવાસી જ્યોતિ `Travel with Joo` નામની યુટ્યુબ ચેનલ ચલાવે છે. તે સપ્ટેમ્બર 2024 માં પુરીની મુલાકાતે આવી હતી, જ્યાં તેની મુલાકાત એક મહિલા યુટ્યુબર સાથે થઈ હતી. જ્યોતિની યુટ્યુબ ચેનલ અને ઇન્સ્ટાગ્રામ એકાઉન્ટ પર અનુક્રમે ૩.૭૭ લાખ સબ્સ્ક્રાઇબર્સ અને ૧.૩૩ લાખ ફોલોઅર્સ છે. તેના પર દિલ્હીમાં પાકિસ્તાન હાઈ કમિશનમાં કામ કરતા એક પાકિસ્તાની કર્મચારીના સંપર્કમાં હોવાનો આરોપ છે. ૧૩ મેના રોજ, ભારતે પાકિસ્તાની અધિકારીને જાસૂસીમાં સામેલ હોવાના આરોપસર હાંકી કાઢ્યો હતો. પાકિસ્તાની ગુપ્તચર એજન્ટોને સંવેદનશીલ માહિતી આપવાના આરોપસર જ્યોતિની 17 મેના રોજ ધરપકડ કરવામાં આવી હતી.