તું માત્ર મને પ્રેમ કરે છે, એ માટે તારે આ બધું સહન કરવું પડ્યું

જેલમાંથી ઠગ સુકેશે તેની કહેવાતી ગર્લફ્રેન્ડ જૅકલિનને પ્રેમપત્ર લખ્યો છે

સુકેશ ચંદ્રશેખર અને જૅકલિન ફર્નાન્ડિસ

દિલ્હીની જેલમાં બંધ ઠગ સુકેશ ચંદ્રશેખરે ગઈ કાલે વૅલેન્ટાઇન્સ ડેના અવસરે જૅકલિન ફર્નાન્ડિસને પ્રેમપત્ર લખ્યો છે. ૨૦૦ કરોડ રૂપિયાના ખંડણી-કેસમાં જેલમાં બંધ સુકેશે પત્રમાં લખ્યું છે કે આ ઠંડી દીવાલો અને લોખંડના સળિયા આપણને અલગ કરે છે.  સુકેશ ચંદ્રશેખરે આ પત્રમાં જૅકલિનને લખ્યું છે કે હું રણમાં ખોવાયેલા માણસ જેવી તરસ સાથે તને યાદ કરું છું.
પત્રમાં સુકેશે લખ્યું, ‘બેબી, મારી બોમ્મા, તારા કાન પાસે મીઠી વાતો કહેવા માટે તને નજીકથી ભેટી લેવાની તલપ છે. ભલે હાલમાં અંતર હોય, પણ મારો પ્રેમ દરેક અંતરને દૂર કરી આપણને જોડે છે.’
સુકેશે પત્રમાં જૅકલિનને તેના કારણે થયેલી કાનૂની મુશ્કેલીઓ, શરમ અને તનાવ માટે માફી પણ માગી. તેણે લખ્યું કે ‘જે મુશ્કેલીઓ તારે સહન કરવી પડી એ માટે હું હૃદયથી માફી માગું છું. તું માત્ર મને પ્રેમ કરે છે, એ માટે તારે આ બધું સહન કરવું પડ્યું. તું હંમેશા મારી આત્મામાં અંકિત છે અને કોઈ પણ અન્ય પુરુષ તારા હૃદયનો અંશ પણ મેળવી શકશે નહીં.’

સુકેશ ચંદ્રશેખરે ગિફ્ટમાં લક્ઝરી હેલિકૉપ્ટર આપ્યું હોવાનો દાવો કર્યો

ADVERTISEMENT

સુકેશ ચંદ્રશેખર અગાઉ પણ જૅકલિન ફર્નાન્ડિસને મોંઘી ભેટો આપી ચૂક્યો છે. તાજેતરના દાવા મુજબ તેણે જૅકલિનને ‘જેએફ’ લખેલું કાળું લક્ઝરી હેલિકૉપ્ટર ભેટ આપ્યું છે. આ ગિફ્ટ આપીને સુકેશે દાવો કર્યો કે આ હેલિકૉપ્ટર તેની મહેનતની કમાણીથી ખરીદવામાં આવ્યું છે, કોઈ કહેવાતા ગુનાની રકમથી નહીં. ઉલ્લેખનીય છે કે સુકેશ ચંદ્રશેખરની ૨૦૧૫માં કરોડોના છેતરપિંડીના કેસમાં ધરપકડ કરવામાં આવી હતી અને આ પછી કાનૂની-પ્રક્રિયા ચાલી રહી છે.