અમેરિકાના દક્ષિણમાં આવેલું અલાબામા એ એવું રાજ્ય છે જ્યાં પ્રવાસ માત્ર એક સ્થળેથી બીજા સ્થળે પહોંચવાનો નથી, પરંતુ રસ્તામાં મળતા ઇતિહાસ, કુદરતી સૌંદર્ય, સ્થાનિક સંસ્કૃતિ અને લોકોની આત્મીયતા સાથે ધીમે-ધીમે ગાઢ બનતો અનુભવ છે. ફોર્ટ પેઇનથી મોબાઇલ સુધીનો લગભગ ચાર દિવસનો આ રોડ ટ્રિપ ધોધ, પહાડો, અંતરિક્ષ વિજ્ઞાન, સિવિલ રાઇટ્સનો ઇતિહાસ, વિશ્વસ્તરીય ભોજન અને મેક્સિકોના અખાતના મનોહર દરિયાકિનારાને એક જ પ્રવાસમાં સમાવી લે છે. કોઈ આ સફર બાઇક પર એકલા કરે છે, તો કોઈ પરિવાર કે મિત્રોની સાથે કારમાં. પરંતુ મુસાફરી પૂરી થયા પછી દરેક પ્રવાસી સાથે લઈ જાય છે નવી શોધની ખુશી અને જીવનભર યાદ રહે એવી ક્ષણો.
ફોર્ટ પેઇનઃ જ્યાંથી કુદરતના અજાયબીઓની શરૂઆત થાય છે
અલાબામાના ઉત્તર-પૂર્વમાં આવેલું ફોર્ટ પેઇન એટલાન્ટાથી લગભગ 100 કિલોમીટર દૂર છે. ધોધો, ઊંડી ખીણો અને એપાલેચિયન પર્વતોની સંસ્કૃતિ માટે જાણીતો આ વિસ્તાર કુદરતપ્રેમીઓ માટે સ્વર્ગ સમાન છે. અહીં આવેલું લિટલ રિવર કેન્યન નેશનલ પ્રિઝર્વ લુકઆઉટ માઉન્ટનને ચીરીને પસાર થતી અદભુત ખીણ માટે પ્રસિદ્ધ છે. અહીંના ટ્રેલ્સ પરથી વહેતા ઝરણાં અને ખળખળતા રેપિડ્સના નજારા મન મોહી લે છે. સાહસિક પ્રવાસીઓ માટે નજીકનું ડિસોટો સ્ટેટ પાર્ક લગભગ 70 કિલોમીટર લાંબા હાઇકિંગ અને માઉન્ટેન બાઇકિંગ ટ્રેલ્સ, ઝિપલાઇન અને ઇન્ડિયન ફોલ્સ જેવા સુંદર ધોધો માટે જાણીતું છે. સાંજ પડે ત્યારે બક્સ પોકેટ સ્ટેટ પાર્કનું જિમ લિન ઓવરલુક સૂર્યાસ્ત નિહાળવા માટે શ્રેષ્ઠ સ્થળ છે. જ્યારે દિવસનો અંત ડેકાલ્બ કાઉન્ટી પબ્લિક ફિશિંગ લેક ખાતે માછીમારી કરીને કરી શકાય. રાત્રિ રોકાણ માટે ડિસોટો સ્ટેટ પાર્કની પહાડી કેબિન અથવા શેલેટ્સ પ્રવાસને વધુ યાદગાર બનાવે છે. ફોર્ટ પેઇન અને આગામી શહેર હન્ટ્સવિલ વચ્ચે આવેલું સ્કોટ્સબોરોનું Unclaimed Baggage પણ એક અનોખું આકર્ષણ છે. ખોવાઈ ગયેલા સામાનની ખરીદી-વેચાણ માટે જાણીતું આ સ્ટોર પ્રવાસીઓને અચાનક મળતી રસપ્રદ વસ્તુઓથી આશ્ચર્યચકિત કરી દે છે.
16 July, 2026 03:44 IST | Alabama | Gujarati Mid-day Online Correspondent
