મિસ ઇંગ્લૅન્ડ મિલ્લા મૅગી ચોંકાવનારા આક્ષેપો કરીને ભારતમાં યોજાઈ રહેલી મિસ વર્લ્ડ સ્પર્ધા છોડીને જતી રહી છે ત્યારે આ સવાલ પૂછીએ મુંબઈની એવી કેટલીક લેડીઝને જે આ ક્ષેત્ર સાથે સંકળાયેલી છે
ભારતમાં હૈદરાબાદમાં યોજાઈ રહેલી મિસ વર્લ્ડ ૨૦૨૫ સ્પર્ધામાંથી તાજેતરમાં મિસ ઇંગ્લૅન્ડ મિલ્લા મૅગી ચોંકાવનારા આક્ષેપો કરીને અધવચ્ચેથી જ ખસી ગઈ અને સ્વદેશ જતી રહી. મિસ ઇંગ્લૅન્ડે કહ્યું કે તેને આ બ્યુટી-કૉન્ટેસ્ટમાં પ્રૉસ્ટિટ્યુટ હોવા જેવી લાગણી થતી હતી અને પુરુષ સ્પૉન્સરો સામે એ રીતે પેશ કરવામાં આવતી હતી જાણે અમારે તેમનું મનોરંજન કરવાનું હોય.
મિલ્લા મૅગીની આ રીતની એક્ઝિટ ભારતમાં જ નહીં પણ આંતરરાષ્ટ્રીય સ્તરેય ચર્ચાનું કારણ બની છે. મિસ વર્લ્ડનાં ૭૪ વર્ષમાં કોઈ સ્પર્ધક અધવચ્ચેથી કૉન્ટેસ્ટ મૂકીને ઘરે જતી રહી હોય એવું પહેલી વાર બન્યું છે. સ્પર્ધામાં ભાગ લેવા હૈદરાબાદ આવેલી મિલ્લા મૅગીએ ઇંગ્લૅન્ડ પહોંચ્યા બાદ આયોજકો પર ગંભીર આક્ષેપો લગાવતાં બ્રિટિશ અખબારને ઇન્ટરવ્યુ આપતાં જણાવ્યું હતું, ‘અમને ઇન્વેસ્ટર્સ સાથે સમય વિતાવવાનું અને મનોરંજન કરવાનું કહેવામાં આવતું હતું. સ્પર્ધકોને આખો દિવસ મેકઅપ કરીને બેસવાની અને નાસ્તો કરતી વખતે પણ બૉલ ગાઉન પહેરવાની ફરજ પાડવામાં આવતી હતી. મારી સાથે પ્રૉસ્ટિટ્યુટ જેવો વ્યવહાર થઈ રહ્યો છે એવું ફીલ થતું હતું. દરેક ટેબલ પર છ મહેમાનો અને બે છોકરીને બેસાડવામાં આવતી અને મહેમાનોને ખુશ કરવાનું કહેવામાં આવતું હતું. આ બધું જોઈને મને ખરાબ લાગ્યું છે, હું કોઈનું મનોરંજન પૂરું પાડવા માટે નહોતી આવી. સ્પર્ધામાં ભાગ લેતી ૧૦૯ છોકરીઓને બોરિંગ કહીને ઠપકો આપવામાં આવતો હતો. સ્પર્ધક સાથે દુર્વ્યવહાર કરવામાં આવી રહ્યો હતો અને હું એ સહન કરી શકી નહીં.’
આ ઘટનાક્રમને પગલે ‘મિડ-ડે’ એ બ્યુટી-કૉન્ટેસ્ટના જગત સાથે સંકળાયેલી કેટલીક મહિલાઓ સાથે વાત કરીને આ દુનિયા કેટલી સેફ છે એ જાણવાનો પ્રયાસ કર્યો.
30 May, 2025 12:54 IST | Hyderabad | Kajal Rampariya
