પોતાની સાથે છેતરપિંડી થઈ હોવાનું જણાઈ આવતાં આખરે તેણે વિઠ્ઠલવાડી પોલીસ-સ્ટેશનમાં આ બાબતે ફરિયાદ કરી છે
પ્રતીકાત્મક તસવીર
થાણેમાં રહેતા ૪૮ વર્ષના કોચિંગ ક્લાસના માલિકે શૅરબજારમાં કમાણી કરવાના હેતુથી એેક વૉટ્સઍપ ગ્રુપ જૉઈન કરીને ઇન્વેસ્ટમેન્ટ કર્યું હતું. કમાણી તો બાજુએ રહી પણ તેણે રોકેલા ૧.૮૮ કરોડ રૂપિયા પણ ગુમાવવાનો વારો આવ્યો હતો. તેની સાથે સાઇબર-ફ્રૉડ કરવામાં આવ્યો હતો. અંતે તેણે આ સંદર્ભે પોલીસમાં ફરિયાદ નોંધાવી હતી.
પોલીસના જણાવ્યા અનુસાર માર્ચમાં કોઈ અજાણી વ્યક્તિએ તેને ‘સ્ટૉક વૅનગાર્ડ F’ વૉટ્સઍપ ગ્રુપમાં ઍડ કર્યો હતો. એ ગ્રુપમાં ૧૭૧ સભ્યો હતા અને એના પર શૅરબજારના ટ્રેડિંગને લગતી માહિતી આપવામાં આવતી હતી. એ ગ્રુપ પરની માહિતીમાં તેને વજૂદ લાગતાં તેણે એમાં મળેલી ટિપ્સને આધારે રોકાણ કર્યું હતું. એ પછી તેને બીજા ‘સ્ટૉક વૅનગાર્ડ-વીઆઇપી’ ગ્રુપમાં ઍડ કરવામાં આવ્યો હતો. એ પછી ઈશા, દિવ્યા અને રાજ નામની વ્યક્તિઓએ તેનો સંપર્ક કર્યો હતો અને તેનો વિશ્વાસ સંપાદન કરવા તેને સેબીનું એક સર્ટિફિકેટ પણ બતાવ્યું હતું. ત્યાર બાદ તેને CINVEN/IC SERVICES નામની એક ઍપ ડાઉનલોડ કરવા કહ્યું હતું અને તેને અઢળક ફાયદો થશે એમ કહેવામાં આવતાં તેણે એ ઍપ દ્વારા ૧.૮૮ કરોડ રૂપિયા કરતાં વધુ રકમ ઇન્વેસ્ટ કરી હતી, જ્યારે તેણે એ ઇન્વેસ્ટમેન્ટમાંથી રકમ પાછી માગી ત્યારે એમાં કોઈ પણ રિસ્પૉન્સ મળ્યો નહોતો એટલે પોતાની સાથે છેતરપિંડી થઈ હોવાનું જણાઈ આવતાં આખરે તેણે વિઠ્ઠલવાડી પોલીસ-સ્ટેશનમાં આ બાબતે ફરિયાદ કરી છે. જોકે આ સંદર્ભે હજી સુધી કોઈની ધરપકડ કરાઈ નથી.