હવે કપલે વકીલની મદદથી ટી-મોબાઇલ સામે કોર્ટ-કાર્યવાહી શરૂ કરી છે
પ્રતીકાત્મક તસવીર
અમેરિકાના ફ્લૉરિડામાં રહેતા રેને રેમન્ડ પત્ની લિન્ડા સાથે સ્વિટ્ઝરલૅન્ડના પ્રવાસે ગયા હતા. સ્વિટ્ઝરલૅન્ડ રેનેનું વતન છે એટલે યુરોપમાં વેકેશનની સાથે સ્વિટ્ઝરલૅન્ડમાં બાળપણનાં સંસ્મરણો પણ તાજાં કરવાનો તેમનો આશય હતો. જોકે રજાઓ માણી લીધા બાદ બન્ને ફ્લૉરિડા પાછાં આવ્યાં એ પછી તેમનું ફોનનું બિલ ૧.૪૨ લાખ ડૉલર એટલે કે આશરે ૧.૨૦ કરોડ રૂપિયા આવ્યું હતું. આટલું ઊંચું બિલ આવતાં બન્ને ચોંકી ગયાં હતાં. રેને અને લિન્ડા અગાઉ પણ સ્વિટ્ઝરલૅન્ડના પ્રવાસે ગયાં હતાં, પણ આટલું બધું બિલ ક્યારેય આવ્યું નહોતું. ત્યાર બાદ રેનેએ મોબાઇલ સર્વિસ પ્રોવાઇડર કંપની ટી-મોબાઇલનો સંપર્ક કરતાં જે જવાબ મળ્યો એ જાણીને રેનેને શૉક લાગ્યો હતો. અમેરિકી કપલે સ્વિટ્ઝરલૅન્ડમાં રજાઓ દરમ્યાન સંખ્યાબંધ ફોટો ક્લિક કર્યા હતા. આ ફોટો તેમણે અમેરિકા તથા અન્ય દેશમાં રહેતા મિત્રો, પરિચિતો સાથે શૅર કર્યા હતા. એ માટે તેમણે આશરે ૯.૫ જીબી ડેટા યુઝ કર્યો હતો. મોબાઇલ-કંપનીએ ઇન્ટરનેટ ડેટા માટે ૧.૨૦ કરોડ રૂપિયાનું બિલ પકડાવી દીધું હતું. હવે રેનેએ વકીલની મદદથી ટી-મોબાઇલ સામે કોર્ટ-કાર્યવાહી શરૂ કરી છે.
