ઘરથી આટલે દૂર મળેલું સન્માન દિલને સ્પર્શી ગયું

અનુપમ ખેરે અમેરિકાના ઓહાયોમાં થયેલા બહુમાન બદલ ખુશી વ્યક્ત કરી

અનુપમ ખેર

અનુપમ ખેરને સિનેમાની દુનિયામાં ચાર દાયકાથી વધુ સમય થઈ ગયો છે. તેમણે ફિલ્મોમાં પોતાની અભિનયપ્રતિભાનો પરચો આપ્યો છે. આ ઉપરાંત તેઓ થિયેટર અને સ્ટેજ-શો માટે પણ ચર્ચામાં રહે છે. અનુપમ ખેરના અભિનયના માત્ર ભારતમાં જ નહીં, વિદેશોમાં લોકો પ્રશંસક છે. તાજેતરમાં અનુપમ ખેરને અમેરિકાના ઓહાયો રાજ્યમાં વિશેષ સન્માન મળ્યું છે. આ સન્માનથી ખુશ અનુપમ ખેરે સોશ્યલ મીડિયા પર પોસ્ટ કરીને પોતાની આનંદની લાગણી વ્યક્ત કરી છે.
સન્માન મળ્યા પછી અનુપમ ખેરે પોતાની લાગણી વ્યક્ત કરતા લખ્યું હતું કે ‘હું ખૂબ જ સન્માનિત અને વિનમ્ર અનુભવી રહ્યો છું. ઓહાયો રાજ્ય તરફથી આ વિશેષ સન્માન મેળવીને ખૂબ જ સારું લાગી રહ્યું છે. ઓહાયો રાજ્ય તરફથી આ વિશેષ સન્માન મળવું મારા માટે એક અદ્ભુત અનુભવ છે. આ સન્માન સિનેમામાં મારી ચાર દાયકાથી વધુની સફર અને કોલંબસમાં અમારા લાઇવ સ્ટેજ-શો ‘જાને પહચાને અનજાને’ને મળેલી ઓળખનું પરિણામ છે. આ શાનદાર સન્માન માટે ઓહાયોના ગવર્નર માઇક ડિવાઇન અને લેફ્ટનન્ટ ગવર્નર જિમ ટ્રેસેલનો દિલથી આભાર. હું આ સન્માનને ખૂબ જ ગર્વ અને વિનમ્રતા સાથે સ્વીકારું છું. આ સન્માન માત્ર મારા માટે નથી, પણ હું ભારતીય ફિલ્મ ઇન્ડસ્ટ્રીનો પણ આભારી છું જેણે મને મારી ઓળખ આપી. આ સાથે ‘જાને પહચાને અનજાને’ની શાનદાર કાસ્ટ અને ક્રૂનો પણ આભાર જેમના જુસ્સા અને સમર્પણે દરેક પર્ફોર્મન્સને આટલું ખાસ બનાવી દીધું. ઘરથી આટલી દૂર આ રીતે સ્વાગત અને સન્માન મળવું દિલને સ્પર્શી જતો અનુભવ છે. આ યાદગાર સન્માન માટે ઓહાયાનો આભાર. જય હિન્દ.’