‘બટવારા 1947’ની રિલીઝ પહેલાં પ્રીતિ ઝિન્ટાએ હમીદા પાત્રના લુક-ટેસ્ટની સુંદર તસવીર શૅર કરી છે. આ ફિલ્મથી તે ૮ વર્ષ બાદ મોટા પડદા પર કમબૅક કરી રહી છે.
પ્રીતિ ઝિન્ટા
આજે રિલીઝ થઈ રહેલી ફિલ્મ ‘બટવારા 1947’ પહેલાં અભિનેત્રી પ્રીતિ ઝિન્ટાએ સોશ્યલ મીડિયા પર આ ફિલ્મના પોતાના પાત્ર હમીદાના લુક-ટેસ્ટ સમયની એક સુંદર તસવીર શૅર કરી છે.
પ્રીતિ ઝિન્ટા આ તસવીરમાં સાદી કિનારીવાળી સાડીમાં અત્યંત શાલીન અને આકર્ષક લુકમાં નજરે પડે છે. તેણે માથા પર સાડીનો પલ્લુ રાખેલો છે, જ્યારે તેના વાંકડિયા વાળ અને હાથમાં પહેરેલી સોનાની બંગડીઓ તેના આ સાદા છતાં મનમોહક લુકને વધુ સુંદર બનાવે છે.
આ તસવીર સાથે પ્રીતિએ સોશ્યલ મીડિયા પર એક ભાવુક નોંધ લખતાં જણાવ્યું હતું કે ‘હું ‘બટવારા 1947’ની રિલીઝની પૂર્વસંધ્યાએ એ ક્ષણ તરફ પાછી જવા માગતી હતી જ્યાંથી આ બધું શરૂ થયું હતું. આ તસવીર એ લુક-ટેસ્ટ સમયની છે જ્યાં મેં પહેલી વાર હમીદાની ઝલક જોઈ અને અનુભવી હતી.’
ઉલ્લેખનીય છે કે ‘બટવારા 1947’ ફિલ્મ દ્વારા પ્રીતિ ઝિન્ટા ૮ વર્ષના મોટા વિરામ બાદ મોટા પડદા પર વાપસી કરી રહી છે. રાજકુમાર સંતોષીના નિર્દેશનમાં અને આમિર ખાન પ્રોડક્શન્સના બૅનર હેઠળ બનેલી આ ફિલ્મમાં સની દેઓલ મુખ્ય ભૂમિકામાં છે; જ્યારે શબાના આઝમી, અલી ફઝલ અને અભિમન્યુ સિંહ પણ મહત્ત્વનાં પાત્રોમાં જોવા મળશે.
૧૯૪૭ના ભારત-પાકિસ્તાન ભાગલાની પૃષ્ઠભૂમિ પર લાહોર શહેરમાં આધારિત આ ફિલ્મ અસગર વજાહતના પ્રખ્યાત નાટક ‘જિસ લાહૌર નઇ દેખ્યા, ઓ જમ્યાઇ નઇ’થી પ્રેરિત માનવામાં આવે છે. આ શીર્ષકનો અર્થ એવો થાય છે કે તમે લાહોર નથી ગયા તો એમ સમજો કે તમે જન્મ્યા જ નથી.
