ગુજરાતી મિડ-ડે ડૉટ કૉમ તમારી માટે લઈને આવ્યું છે `વન્ડર વુમન`ની ખાસ રજૂઆત. આમ તો સમાજની દરેક મહિલા પોતાના `સ્ત્રીત્વ`ના બળે જીવનમાં ઊંચાઈને પામે છે. વળી, આપણી આસપાસ પણ એવી અનેક મહિલાઓ છે, જેમના સમર્પણ, જુસ્સા અને અડગ નિશ્ચયે તેમને નવા મુકામ આપ્યા છે! એક સ્ત્રી ધારે તો શું ન કરી શકે? નિર્દોષ, નિષ્કામ ને નિરાભિમાની નજર વડે જોશો તો પુરુષ સમોવડી થયેલી અનેક સ્ત્રીઓના પ્રેરણાદાયી ઉદાહરણો તમને સાંપડશે. મોટી ઉંમરના ઉંબરાને પણ સહજતાથી ઠેંકીને સ્ત્રી પોતાના શોખને જીવંત કરતી હોય છે. અહીં અમે એવી જ પ્રેરક મહિલાઓની વાત માંડીશું જેઓએ ધીરજ અને આત્મવિશ્વાસની આંગળી પકડીને જીવનમાં નવેસરથી ડગ ભર્યાં છે. ન માત્ર પોતાના કે પોતાના પરિવાર માટે કિન્તુ સમાજના બળબળતાં પ્રશ્નો સામે ઝઝૂમવા માટે મીટ માંડી છે. બેચલરની ડિગ્રી હોય, બિઝનેસ હોય કે પછી હોય બબૉક્સિંગ! આ પ્રેરણાદાયી મહિલા તો સમાજની સૌ સ્ત્રી માટે અજવાળું બની છે. આજનાં આપણાં વન્ડર વુમન છે ઍક્ટ્રેસ શ્રુતિ ઘોલપ.
સાવધાન ઇન્ડિયા, ક્રાઇમ પેટ્રોલ, બાલવીર, આનંદી બા ઔર ફૅમિલી જેવી અઢળક ટીવી સિરિયલ્સ અને અત્યારે `ઓહ હમનવા તુમ દેના સાથ મેરા`માં પોતાના અભિનયનો જાદુ પાથરી રહેલ ઍક્ટ્રેસ શ્રુતિ ઘોલપની સફરમાં નવું છોગું ઉમેરાયું હોય એમ તેઓએ ક્લિનિકલ સાયકોલોજીમાં માસ્ટર્સ પૂર્ણ કરીને `ધ સૉલ સ્પર્શ` નામે કાઉન્સેલિંગ ક્ષેત્રે પણ મંડાણ કર્યું છે. પોતાની આર્થિક અને પારિવારિક જવાબદારીઓ એકલા હાથે સંભાળીને પોતાની થિયેટરના મંચથી ગ્લેમર વર્લ્ડ સુધી પોતાની આગવી છાપ ઊભી કરનાર આ ઍક્ટ્રેસે હવે સમાજના લોકોના જીવનને પોઝિટીવીટીથી ભરવા બાથ ભીડી છે ત્યારે ગુજરાતી મિડ-ડે ડૉટ કૉમે તેમની આ સફર વિશે વિગતે જાણ્યું હતું, અને હવે તે આપ સૌ સમક્ષ.
22 July, 2026 10:27 IST | Mumbai | Dharmik Parmar
