શાસ્ત્રોમાં કેટલીક ટિપ્સ એવી છે જેનું નિયમિત પાલન કરવામાં આવે તો દિવસ વધારે સર્જનાત્મક અને શુભ બને છે. આ ટિપ્સ કઈ છે એ જાણીએ
પ્રતિકાત્મક તસવીર
ઘરની બહાર નીકળીને કામ કરતી દરેક વ્યક્તિ ઇચ્છતી હોય છે કે તેનો દિવસ શુભ રહે અને તેને તમામ કાર્યમાં સફળતા મળે. આ માટે શાસ્ત્રોમાં અનેક ટિપ્સ આપેલી છે. એમાંથી અમુક ટિપ્સ એવી છે જેનો અમલ કરવો સહેલો અને સરળ છે. દેખાવે સાવ નાની લાગતી એ વાતોનું પાલન કરવામાં આવે તો વ્યક્તિનો દિવસ શુભ અને સફળ બને છે.
દિવસ સફળ બનાવવા માટે વ્યક્તિએ પોતાની સાથે શું-શું રાખવું જોઈએ એ વાત હવે કરીએ.
કૉપર બૉટલનું પાણી
ADVERTISEMENT
આપણા વડવાઓ કહેતા કે તાંબાના વાસણમાં ભરેલું પાણી પીવું જોઈએ, જે સાયન્ટિફિક રીતે પણ પ્રૂવ થયું છે. તાંબું મન સતર્ક રાખે છે તો સાથોસાથ એનર્જી પણ બૅલૅન્સ કરે છે અને નકારાત્મક ઊર્જાને દૂર રાખે છે. વાસ્તુશાસ્ત્રમાં કૉપર-વૉટરને સૂર્ય-ઊર્જા સાથે સરખાવવામાં આવ્યું છે. એટલે વ્યક્તિએ કૉપરની બૉટલ પોતાની સાથે ઘરેથી જ લેવી જોઈએ અને દિવસ દરમ્યાન એ પાણીનું સેવન કરવું જોઈએ.
જો શક્ય હોય તો પ્રયાસ કરીને બહારનું પાણી પીવાનું પણ ટાળવું જોઈએ, કારણ કે પાણીની પોતાની મેમરી છે. અન્યની મેમરીનું સેવન કરવા કરતાં ઘરેથી લાવેલું પાણી પીવું હિતાવહ છે.
પહેરો ગોમતી ચક્ર
ગોમતી ચક્ર નકારાત્મક એનર્જી દૂર કરવાનું કામ કરે છે તો સાથોસાથ નિર્ણયશક્તિને પણ તીક્ષ્ણ બનાવે છે. ગોમતી ચક્ર નિયમિત ધારણ કરવું જોઈએ અને નિયમિત થોડી-થોડી વારે વ્યક્તિએ ગોમતી ચક્રનો સ્પર્શ પણ કરતા રહેવું જોઈએ. જો ગોમતી ચક્ર ધારણ ન કરી શકો તો અગત્યની મીટિંગ હોય એવા દિવસે લાલ કલરના કપડામાં ગોમતી ચક્ર બાંધીને સાથે લેવું જોઈએ.
ગોમતી ચક્ર ઉપરાંત ગ્રીન જેડ પણ ખૂબ જ લાભદાયી પુરવાર થાય છે. જો બન્ને ધારણ કરવામાં આવે તો ચોક્કસપણે લાભ થઈ શકે છે.
ડાયરી અને પેન
હા, આ બહુ ઉપયોગી છે. પુરુષોએ પોતાના પૉકેટમાં અને મહિલાઓએ પોતાના પર્સમાં નાની ડાયરી અને પેન અચૂક રાખવાં જોઈએ, પણ શોભા માટે નહીં. એનો ઉપયોગ થવો જોઈએ. જે કામ યાદ આવે એ કામને તરત એ ડાયરીમાં ટપકાવી લેવાની આદત કેળવવાથી માઇન્ડ-ક્લટર ઓછું થાય છે. ઘણાને થાય કે મોબાઇલમાં ડાયરી જેવી ઍપ મળતી હોય તો એનો ઉપયોગ કરી શકાય ખરો? તો જવાબ છે ના. અક્ષરો તમારા પોતાના પડે તો જ એ મન પરથી ભાર હળવો કરવાનું અને મનને સ્પષ્ટ કરવાનું કામ કરે.
ડાયરી અને પેન રાખવાથી ડિસિઝન લેવાની ક્ષમતા વિકસે છે.
સાથે રાખો ફોટો
વૉલેટ કે પર્સમાં મા એટલે કે મમ્મી કે ગુરુનો નાનો ફોટો અવશ્ય રાખવો જોઈએ અને દિવસમાં ઓછામાં ઓછા બે વખત એ ફોટોનાં દર્શન કરવાં જોઈએ. જો ઈશ્વરમાં શ્રદ્ધા હોય તો તમે હનુમાનજી કે ગણેશજીનો ફોટો પણ રાખી શકો છો. કુળદેવી કે અન્ય ઈશ્વરના ફોટોગ્રાફ્સ રાખવાનું બને તો ટાળવું, કારણ કે તેમને અસાધના લાગી શકે છે.
ઈશ્વર, મા કે ગુરુ સાચું માર્ગદર્શન આપવાનું કામ કરે છે તો સાથોસાથ ખોટું કામ કરવામાં ખચકાટ આપવાનું કામ પણ કરે છે. સાથે રાખવામાં આવેલા તેમના ફોટોની બીજી એક ખાસિયત એ પણ છે કે એ વિઘ્નહર્તાનું કામ કરે છે. જોકે ફોટો માત્ર મૂકી રાખવાનો નથી, શ્રદ્ધાભાવ સાથે એને રાખવાનો છે. જો મા કે ગુરુ સાથે કે પાસે જ હોય તો દિવસની શરૂઆત તેમનાં દર્શન કરીને કે આશીર્વાદ લઈને જ કરવી જોઈએ.
ડાબા કાંડે લાલ દોરો
મહિલા હોય કે પુરુષ, તેણે પોતાના ડાબા કાંડે લાલ દોરો બાંધવો જોઈએ. એ બાંધતી વખતે કુળદેવીનું સ્મરણ કરવું જોઈએ. લાલ દોરો સૂર્ય અને મંગળનું પ્રતીક છે જે સુરક્ષા આપવાની સાથોસાથ હિંમત આપવાનું કામ કરે છે. લાલ દોરો શક્ય હોય તો મા કે બહેન પાસે બંધાવવો. જો તે ન હોય તો દીકરી કે પત્ની પાસે પણ બંધાવી શકાય. ડાબા કાંડે બાંધવામાં આવેલો લાલ દોરો સ્ટેબિલિટી પણ આપે છે, જેને કારણે ઉતાવળ સાથે નિર્ણય લેવાની કે પછી શબ્દો ઉચ્ચારણ કરવાની ખરાબ અને ખોટી આદત દૂર કરે છે.
એક વાત યાદ રહે કે ડાબા કાંડે બાંધેલો દોરો ધાર્મિકતાનું પ્રતિનિધિત્વ નથી કરતો. એ દોરો વ્યક્તિના સાથી તરીકેનું કામ કરે છે એટલે ડાબા હાથમાં બાંધવામાં ખચકાટ અનુભવવો નહીં.
