લોકો છોડને પણ પોતાના ઇન્ટીરિયરનો એક ભાગ માનીને એને સુંદર રીતે રજૂ કરવા લાગ્યા છે. જે વસ્તુઓ પહેલાં માત્ર છોડને સપોર્ટ આપવા માટે વપરાતી હતી એ ચીજો હવે ઘરની સુંદરતા વધારતી સ્ટાઇલિશ ડેકોર પીસ બની ગઈ છે
હવે છોડને ટેકો આપતા મૉસ પોલ્સ અને ટ્રેલિસ બન્યા છે સ્ટાઇલિશ ડેકોર પીસ
એક સમય હતો જ્યારે વેલાવાળા છોડને ચડાવવા માટે સામાન્ય લાકડી, દોરડું કે પ્લાસ્ટિકની પાઇપનો ઉપયોગ કરવામાં આવતો હતો. જોકે હવે ઇન્ડોર ગાર્ડનિંગ અને નૅચરલ હોમ ડેકોરના વધતા ટ્રેન્ડને કારણે છોડની સંભાળમાં પણ નવી સ્ટાઇલ જોવા મળી રહી છે. મૉસ પોલ્સ અને ટ્રેલિસ હવે માત્ર છોડને ટેકો આપવાનું સાધન નથી રહ્યા.
આજકાલ લોકો ઘરમાં વધુ ને વધુ હરિયાળી ઉમેરવા ઇચ્છે છે. ખાસ કરીને નાના ફ્લૅટ અને અપાર્ટમેન્ટમાં ઇન્ડોર પ્લાન્ટ્સનો ટ્રેન્ડ ઝડપથી વધી રહ્યો છે. આવા છોડને યોગ્ય રીતે વધવા માટે સપોર્ટની જરૂર પડે છે અને અહીં મૉસ પોલ્સ તથા ટ્રેલિસ ઉપયોગી બને છે. સાથે જ એની સુંદર ડિઝાઇન અને નૅચરલ લુકને કારણે એ હોમ ડેકોરનો પણ એક ભાગ બની ગયા છે.
શું છે મૉસ પોલ્સ?
ADVERTISEMENT
મૉસ પોલ એ એવો સપોર્ટ છે જેના પર વેલાવાળા છોડ પોતાનાં મૂળિયાં દ્વારા ચડી શકે છે. સામાન્ય રીતે એમાં નારિયેળના રેસા,, સ્પેગ્નમ શેવાળ અથવા નૅચરલ ફાઇબરનો ઉપયોગ કરવામાં આવે છે. મૉસ પોલ છોડને કુદરતી રીતે ઉપરની તરફ વધવામાં મદદ કરે છે અને એને વધુ ઘન તથા સુંદર બનાવે છે.
ખાસ કરીને મૉન્સ્ટેરા, ફિલોડેન્ડ્રોન, મની પ્લાન્ટ અને અન્ય ક્લાઇમ્બિંગ પ્લાન્ટ્સ માટે મૉસ પોલ્સ ખૂબ લોકપ્રિય છે. છોડ જ્યારે એની આસપાસ ફેલાય છે ત્યારે એક નૅચરલ ગ્રીન સ્કલ્પ્ચર જેવો લુક તૈયાર થાય છે.
નૅચરલ મટીરિયલ્સનો ક્રેઝ
હાલમાં હોમ ડેકોરમાં નૅચરલ મટીરિયલ્સની ડિમાન્ડ વધી રહી છે. લાકડું, નારિયેળના રેસા, બામ્બુ અને હૅન્ડમેડ ફાઇબરથી બનેલા પોલ્સ લોકો વધુ પસંદ કરી રહ્યા છે. આ પ્રકારનું મટીરિયલ છોડની હરિયાળી સાથે સરળતાથી ભળી જાય છે અને ઘરને ઑર્ગેનિક લુક આપે છે.
નાનાં ઘરો માટે સ્માર્ટ ડેકોર
જગ્યાની અછત ધરાવતાં ઘરો માટે આ એક સ્માર્ટ વિકલ્પ છે. એનાથી ફ્લોર પર વધુ જગ્યા લીધા વગર ઊભી દિશામાં છોડ ઉગાડી શકાય છે. બાલ્કની, લિવિંગરૂમના ખૂણા અથવા વર્કસ્પેસમાં એનો ઉપયોગ કરીને નાનું ગ્રીન કૉર્નર બનાવી શકાય છે.
હૅન્ડક્રાફ્ટેડ ડિઝાઇનની ડિમાન્ડ
હવે લોકો તૈયાર પ્લાસ્ટિક સપોર્ટની જગ્યાએ હૅન્ડમેડ અને યુનિક ડિઝાઇનવાળા મૉસ પોલ્સ અને ટ્રેલિસ પસંદ કરી રહ્યા છે. કસ્ટમાઇઝ્ડ સાઇઝ, વુડન ફિનિશ, મૅક્રેમે હૅન્ગિંગ અને બામ્બુની ડિઝાઇન જેવી વિવિધતા બજારમાં જોવા મળે છે. આ વસ્તુઓ છોડ સાથે ઘરની થીમને પણ મૅચ કરે છે.
છોડ અને ઇન્ટીરિયરનો સુંદર મેળ
મૉસ પોલ્સ અને ટ્રેલિસનો સૌથી મોટો ફાયદો એ છે કે એ છોડને સ્વસ્થ રીતે વધવામાં મદદ કરે છે અને સાથે ઘરની સુંદરતા પણ વધારે છે. લીલાછમ વેલા જ્યારે સુંદર સપોર્ટ પર ફેલાય છે ત્યારે એ ઘરમાં કુદરતી શાંતિ અને તાજગીનો અનુભવ કરાવે છે.
હાલના હોમ ડેકોર ટ્રેન્ડમાં લોકો કુદરતને ઘરની અંદર લાવવાનો પ્રયાસ કરી રહ્યા છે ત્યારે આ વસ્તુઓ માત્ર ગાર્ડનિંગ ટૂલ્સ નથી રહી, આધુનિક ઘરોમાં નૅચરલ સ્ટાઇલ અને સર્જનાત્મકતાનો એક મહત્ત્વપૂર્ણ ભાગ બની ગઈ છે.
ટ્રેલિસનો નવો અવતાર
ટ્રેલિસ એટલે છોડને ચડવા માટે બનાવવામાં આવતી જાળીદાર રચના. પહેલાં એનો ઉપયોગ મુખ્યત્વે બગીચામાં થતો હતો, પરંતુ હવે એને ઇન્ડોર અને બાલ્કની ડેકોરમાં પણ સામેલ કરવામાં આવી રહી છે.
લાકડાની, મેટલની અથવા બામ્બુની ટ્રેલિસ હવે માત્ર ઉપયોગી વસ્તુ નથી રહી, એક સુંદર વિઝ્યુઅલ એલિમેન્ટ બની ગઈ છે. એમાં વેલાવાળા છોડ ચડતા જાય ત્યારે એ દીવાલ અથવા ખૂણાને એક નૅચરલ આર્ટ પીસમાં ફેરવી દે છે.
