રૉયલ અને ક્લાસિક લુક મેળવવા માટે ટિન્ટેડ સનગ્લાસિસ મેન્સ ફૅશનમાં પર્ફેક્ટ ઍક્સેસરી બની ગયા છે
૧૯૭૦ના દાયકાના ટિન્ટેડ સનગ્લાસિસનું મેન્સ ફૅશનમાં કમબૅક
ફૅશનનું ચક્ર હંમેશાં પુનરાવર્તિત થાય છે એનો તાજો પુરાવો ૧૯૭૦ના દાયકાના ટિન્ટેડ સનગ્લાસિસનું કમબૅક છે. પીળા, વાદળી, બ્રાઉન અન એમ્બર જેવા હળવા શેડ્સ ધરાવતા સનગ્લાસિસ મેન્સ ફૅશનમાં શાહી અને રેટ્રો વાઇબ્સ ઉમેરે છે. આવા સનગ્લાસિસની ખાસિયત એ છે કે એ આંખોને પૂર્ણપણે ઢાંકવાને બદલે નૅચરલ શેડ આપે છે જેથી તમારો ચહેરો અને આંખોના એક્સપ્રેશન્સ સ્પષ્ટ દેખાય છે. જો તમારા સનગ્લાસિસ કલેક્શનમાં આ રેટ્રો લુક ઉમેરવા માગો છો તો એને યોગ્ય રીતે સ્ટાઇલ કરવા માટેની સરળ ટિપ્સ આ રહી.
આઉટફિટના રંગો સાથે બૅલૅન્સ કરો
ADVERTISEMENT
ટિન્ટેડ લેન્સમાં કલર હોવાથી કપડાંની પસંદગી ન્યુટ્રલ રાખવી વધુ યોગ્ય રહે છે. બેજ, સફેદ, નેવી બ્લુ કે ગ્રે જેવા શેડ્સ સાથે પીળા કે બ્રાઉન ટિન્ટવાળા ગ્લાસિસ બેસ્ટ કૉન્ટ્રાસ્ટ લુક ક્રીએટ કરે છે.
ફ્રેમના સિલેક્શન પર ધ્યાન આપો
૭૦ના દાયકાના અસલી વાઇબ્સ મેળવવા માટે ઓવરસાઇઝ્ડ એવિએટર અથવા ચોરસ મેટલ અને ઍસિટેટ ફ્રેમ પસંદ કરો. પાતળી ગોલ્ડન કે સિલ્વર મેટલ ફ્રેમ રૉયલ લુક આપશે.
બધા લુક માટે બેસ્ટ
કૅઝ્યુઅલ લુક : પ્રિન્ટેડ શર્ટ, ડેનિમ અને સ્નીકર્સ સાથે યલો કે ઑરેન્જ ટિન્ટ ગ્લાસિસ પહેરીને રેટ્રો કૂલ લુક મેળવી શકાય છે.
ફૉર્મલ લુક : સિંગલ-બ્રેસ્ટેડ સૂટ કે બ્લેઝર સાથે બ્રાઉન અથવા ગ્રે ટિન્ટ ગ્લાસિસ સ્ટાઇલ કરશો તો એ ક્લાસી અને રૉયલ લુક આપશે.
ઍક્સેસરીઝ ઓછી રાખો : સનગ્લાસિસ પોતે જ એક બોલ્ડ સ્ટેટમેન્ટ પીસ છે એટલે હેવી જ્વેલરી, ગળામાં જાડી ચેઇન અથવા વધુ પડતી ઍક્સેસરીઝ ટાળો જેથી ફોકસ ગ્લાસિસ પર જ રહે.
ઇન્ડોર અને નાઇટ ઇવેન્ટ્સ માટે અનુકૂળ : ડાર્ક સનગ્લાસિસની સરખામણીએ ટિન્ટેડ ગ્લાસિસમાં વિઝિબિલિટી સારી હોય છે એટલે સાંજના સમયે કે ઇન્ડોર સોશ્યલ ઇવેન્ટ્સમાં પણ એને સરળતાથી સ્ટાઇલ કરી શકાય છે.
કેવી રીતે કૅરી કરશો?
ટિન્ટેડ સનગ્લાસિસ પસંદ કરતી વખતે ચહેરાનો આકાર ખાસ ધ્યાનમાં રાખવો જોઈએ. જો તમારો ચહેરો ગોળ હોય તો એના પર સ્ક્વેર કે રેક્ટેન્ગલ ફ્રેમ વધારે સારી લાગશે. જો ચહેરો ચોરસ હોય તો એના પર ઓવલ અથવા રાઉન્ડ એવિએટર ફ્રેમ સૂટેબલ રહેશે. ઓવલ ચહેરો ધરાવતા પુરુષો પર કોઈ પણ શેપની ઓવરસાઇઝ્ડ ફ્રેમ એકદમ પર્ફેક્ટ દેખાશે.
કૂલ કૅઝ્યુઅલ લુક માટે વાઇટ ટી-શર્ટ, બ્લુ ડેનિમ સાથે યલો ટિન્ટેડ એવિએટર્સ સ્ટાઇલ કરો. સ્માર્ટ કૅઝ્યુઅલ વાઇબ માટે પ્રિન્ટેડ શર્ટ અને ચીનોસ સાથે એમ્બર કે ઑરેન્જ ટિન્ટ પસંદ કરો. રૉયલ ફૉર્મલ લુક માટે નેવી બ્લુ બ્લેઝર અને વાઇટ શર્ટ સાથે બ્રાઉન ટિન્ટ ગ્લાસિસ ઉત્તમ કૉમ્બિનેશન પૂરું પાડે છે.
