પુરુષોને અત્યારે કયો પ્રશ્ન સૌથી વધારે સતાવે છે?

એક તો એ કે આપણે ત્યાં જાહેરમાં સેક્સવિષયક પ્રશ્ન પૂછવાની બાબતમાં બહુ શરમ આવે છે : બીજી એ વાત નોટિસ કરી કે આજે મોટા ભાગનાં છોકરા-છોકરીઓ પોતાના પ્રાઇવેટ પાર્ટ્સને લઈને વધારે પડતું જ વિચારતાં થયાં છે

પ્રતીકાત્મક તસવીર (તસવીર સૌજન્યઃ એઆઇ)

હમણાં મુંબઈમાં સેમિનાર બહુ થાય છે એટલે વારંવાર મુંબઈના અલગ-અલગ કલ્ચરના અને ઉંમરના લોકોને મળવાનું બને છે. છેલ્લા આઠેક સેમિનારનું જો કોઈ એક ચોક્કસ તારણ કાઢીને કહેવાનું હોય તો બે વાત કહેવી છે. એક તો એ કે આપણે ત્યાં જાહેરમાં સેક્સવિષયક પ્રશ્ન પૂછવાની બાબતમાં બહુ શરમ આવે છે. જાહેરમાં એટલે માઇક લઈને સવાલ કરવાની જ વાત નહીં, પણ બે-ચાર લોકો ઊભા હોય ત્યારે પણ સવાલ પૂછવામાં લોકોને શરમ આવતી હોય છે. એમાં પણ ખાસ કરીને છોકરાઓને. હા, યુવતીઓ હવે આઉટસ્પોકન થઈ છે, પણ છોકરાઓ એટલા જ સંકુચિત થતા જોવા મળે છે. બીજી એ વાત નોટિસ કરી કે આજે મોટા ભાગનાં છોકરા-છોકરીઓ પોતાના પ્રાઇવેટ પાર્ટ્સને લઈને વધારે પડતું જ વિચારતાં થયાં છે. પહેલાં આવું નહોતું. 
આવું કેમ બન્યું હશે એ વિશે જો જાણવાની કોશિશ કરો તો તમને સમજાય કે સોશ્યલ મીડિયાનો જ્યારથી વ્યાપ વધ્યો ત્યારથી આ દેખાદેખી આવી છે તો સાથોસાથ મોબાઇલ નેટવર્કની કનેક્ટિવિટી ફાસ્ટ થવાને કારણે ઈઝીલી અવેલેબલ થઈ શકતા વિડિયો-કન્ટેન્ટને કારણે પણ આવું થયું છે. વાત કરીએ તાજેતરમાં કરેલા એક સેમિનારની.

હવે તો અમને લોકોને ખબર જ હોય છે કે સેમિનાર પછીનો પ્રશ્નોત્તરીનો રાઉન્ડ ૧૦ જ મિનિટમાં પૂરો થઈ જશે અને પછી બે કલાક સુધી લોકો આવી-આવીને અંગત રીતે પોતાની મૂંઝવણો કહેશે. એવું જ બન્યું. સેમિનાર પૂરો થયા પછી આવું લગભગ ૪ કલાક ચાલ્યું અને એ ૪ કલાક દરમ્યાન ત્રીસથી ૩૫ વર્ષના મોટા ભાગના યંગસ્ટર્સ આવીને પોતાના પ્રાઇવેટ પાર્ટની સાઇઝ બાબતના સવાલ કરે. એજ્યુકેશનની દૃષ્‍ટિએ જોઈએ તો હાઇલી એજ્યુકેટેડ, માસ્ટર્સ કર્યું હોય અને ગોલ્ડ મેડલિસ્ટ હોય અને એ પછી પણ તેમના સવાલો સાંભળીને આશ્ચર્ય થાય કે આવું તેમના મનમાં કઈ રીતે આવી શકે?

ADVERTISEMENT

નાના પ્રાઇવેટ પાર્ટને લીધે હું મારી વાઇફને સૅટિસ્ફૅશન આપી નહીં શકતો હોઉં? નાના પ્રાઇવેટ પાર્ટને કારણે હું બાપ બની નહીં શકું? પ્રાઇવેટ પાર્ટ ડાર્ક કલરનો છે તો શું હું ભવિષ્યમાં એટલો જ કાળો થઈ જઈશ?

આ અને આવા તો અઢળક સવાલો સાંભળ્યા અને એ સાંભળતી વખતે સાચે જ આ યંગસ્ટર્સની દયા પણ આવતી હતી અને સાથોસાથ તેમના પર હસવું પણ આવતું હતું. જો કોઈ એક સવાલ કૉમન હોય તો એ કે મારો પ્રાઇવેટ પાર્ટ બહુ નાનો છે. બધેબધાનો એ જ સવાલ હતો કે એની સાઇઝ વધારવા માટે મારે શું કરવું જોઈએ? આ જ પ્રકારનો સવાલ જો કોઈના મનમાં હોય તો તેને સમજાવો. કહો કે સાઇઝ અને પ્લેઝરને ક્યાંય સ્નાનસૂતકનો પણ સંબંધ નથી. પુરુષના માત્ર બે ઇંચના પ્રાઇવેટ પાર્ટથી ફીમેલને સૅટિસ્ફૅક્શન મળી શકે છે અને તે પિતા પણ બની શકે છે એટલે આવું સ્ટ્રેસ મનમાંથી તે કાઢી નાખે.