રાજુલા તાલુકામાં એક યુવાન પર હુમલો કરીને મારી નાખ્યો હતો ચાર સિંહોએ: સક્કરબાગ ઝૂમાં કેદ કરાશે
સિંહ
માણસો પર અમરેલી જિલ્લામાં સિંહોના હુમલા વધી રહ્યા છે ત્યારે આ વિસ્તારના ચાર માનવભક્ષી સિંહોએ એક યુવાન પર હુમલો કરીને તેને મારી નાખતાં આ સિંહોને જૂનાગઢમાં આવેલા સક્કરબાગ ઝૂમાં કેદ કરવામાં આવશે.
અમરેલી જિલ્લાના રાજુલા તાલુકામાં આવેલા કોવાય ગામ પાસે થોડા દિવસ પહેલાં પ્રકાશચંદ્ર નામના યુવાન પર ૪ સિંહોએ હુમલો કરીને તેનો શિકાર કર્યો હતો, જેમાં યુવાનનું મોત થયું હતું. કમકમાટી ઊપજાવે એવી આ ઘટનામાં વનવિભાગે તપાસ હાથ ધરી હતી. જ્યાં ઘટના બની હતી એ વિસ્તારમાં સિંહોની શોધખોળ કરીને બે યુવાન સિંહ અને બે મોટી ઉંમરના સિંહોને પકડી લીધા હતા. કહેવાય છે કે પકડાયેલા આ ૪ સિંહોનાં સૅમ્પલ લઈને તપાસ માટે મોકલ્યાં હતાં જેમાં મરી ગયેલા યુવાનના શરીરના અવશેષો સિંહોનાં સૅમ્પલમાંથી મળી આવ્યા હતા જેથી આ ૪ સિંહોને નિયમ મુજબ કાયમ માટે સક્કરબાગ ઝૂમાં ઍનિમલ કૅર સેન્ટરમાં રાખવામાં આવશે.
