તમારી ચોરાયેલી કાર બનાવટી દસ્તાવેજ સાથે કઈ રીતે સેકન્ડ-હૅન્ડ માર્કેટમાં વેચાવા આવે છે એ જાણી લો

નવી મુંબઈ ક્રાઇમ બ્રાન્ચે આ રીતે વેચાયેલાં ૫.૫ કરોડ રૂપિયાનાં ૨૯ વાહનો જપ્ત કર્યાં છે.

પ્રતીકાત્મક ફાઇલ તસવીર

અલગ-અલગ રાજ્યોમાંથી ચોરાયેલાં વાહનો અને ગેરકાયદે મેળવેલાં વાહનોના એન્જ્નિ નંબર અને શૅસિ નંબર બદલાવી, એના બનાવટી દસ્તાવેજો બનાવી એ વાહનો સેકન્ડ-હૅન્ડ માર્કેટમાં વેચતી આંતરરાજ્ય ટોળકીનો નવી મુંબઈ ક્રાઇમ બ્રાન્ચે પર્દાફાશ કર્યો છે. એ સદંર્ભે ૧૦ એજન્ટની ધરપકડ કરવામાં આવી છે અને અમરાવતીની રીજનલ ટ્રાન્સ્પોર્ટ ઑફિસ (RTO)ના ત્રણ કર્મચારીઓ સામે પણ ગુનો નોંધાયો છે. નવી મુંબઈ ક્રાઇમ બ્રાન્ચે આ રીતે વેચાયેલાં ૫.૫ કરોડ રૂપિયાનાં ૨૯ વાહનો જપ્ત કર્યાં છે.

આ ટોળકી દ્વારા એવા વેહકિલ-ઓનર્સનો સંપર્ક સાધવામાં આવતો જે ઇન્સ્ટૉલમેન્ટ ન ભરી શકતા હોય. તેમની પાસેથી એ વાહનો સસ્તામાં લઈ લેવાતાં અને કહેવાતું કે અમે તમારા બાકીના ઇન્સ્ટૉલમેન્ટ ભરી દઈશું. ત્યાર બાદ બે-ત્રણ ઇન્સ્ટૉલમેન્ટ ભર્યા બાદ એ વાહનો ચોરાઈ ગયાં હોવાની ઑનલાઇન ફરિયાદ કરી દેવાતી. ત્યાર બાદ એ વાહનોના એન્જિન નંબર અને શૅસિ નંબર બદલાવી એ વાહનો અરુણાચલ પ્રદેશ, હિમાચલ પ્રદેશ, મણિપુર અને નાગાલૅન્ડ લઈ જવાતાં. એ પછી એ વાહનોનું ત્યાં રજિસ્ટ્રેશન કરાતું. એક વાર ત્યાં વાહન રજિસ્ટર થઈ જાય એટલે એને પાછું મહારાષ્ટ્રમાં લાવી માર્કેટ કરતાં સસ્તા ભાવે વેચી નાખવામાં આવતું. આ બાબતે ક્રાઇમ બ્રાન્ચના ઑફિસરોને માહિતી મળતાં તેમણે વૉચ રાખી કેટલાંક વાહનો ઝડપ્યાં હતાં અને તપાસ કરતાં આ રૅકેટનો પર્દાફાશ થયો હતો. આવા કેસમાં RTOના કર્મચારીઓ સાથે મિલીભગત હોવાથી એ વાહનોને ફિઝિકલ ચેક નહોતાં કરવામાં આવતાં અને માત્ર દસ્તાવેજોના આધારે ટ્રાન્સફર કરી દેવાતાં હતાં. આ કેસમાં ક્રાઇમ બ્રાન્ચે ૧૦ એજન્ટની ધરપકડ કરી છે અને અમરાવતીના ત્રણ RTO કર્મચારીઓ સામે ગુનો પણ નોંધ્યો છે.