ગોરેગામમાં ૧૦ વર્ષની છોકરીએ પાડોશીની ૧૮ મહિનાની બાળકીને ડક્ટમાંથી નીચે ફગાવી દીધી

ગોરેગામ-ઈસ્ટના નાગરી નિવારા કૉમ્પ્લેક્સના શિવશાહી બિલ્ડિંગમાં બુધવારે રાતે એક ચોંકાવનારી ઘટના બની હતી

પ્રતીકાત્મક તસવીર

ગોરેગામ-ઈસ્ટના નાગરી નિવારા કૉમ્પ્લેક્સના શિવશાહી બિલ્ડિંગમાં બુધવારે રાતે એક ચોંકાવનારી ઘટના બની હતી. ૧૦ વર્ષની એક છોકરીએ તેના પાડોશીની ૧૮ જ મહિનાની બાળકીને ડક્ટમાંથી નીચે ફગાવી દીધી હતી. આ ઘટનામાં ગંભીર ઈજા થતાં તે બાળકીનું મૃત્યુ થયું હતું. આ ઘટના ફ્લોર પર લગાડેલા CCTV કૅમેરામાં કેદ થઈ ગઈ હતી. દિંડોશી પોલીસે ઍક્સિડેન્ટલ ડેથ રિપોર્ટની નોંધ કરી હતી. જોકે આ ઘટનામાં જીવ ગુમાવનારી બાળકીનાં માતા-પિતાએ ૧૦ વર્ષની છોકરીનાં માતા-પિતા સામે આક્ષેપ કર્યો હતો કે તેમણે ઘટના છુપાવવા બિલ્ડિંગના CCTV કૅમેરાના ઍન્ગલ ફેરવી નાખ્યા હતા. જોકે ત્યાર બાદ એ વિડિયો બહાર આવી ગયો હતો.  

મળતી માહિતી મુજબ તે છોકરી પાડોશીને ત્યાં બુધવારે રાતે બાળકી સાથે રમવા ગઈ હતી. ત્યાર બાદ તેણે બાળકીને રમાડતાં-રમાડતાં ઉપાડીને રાતે ૧૦.૩૦ વાગ્યે છઠ્ઠા માળના ડક્ટમાંથી નીચે ફગાવી દીધી હતી અને પછી દોડીને પોતાના ઘરે જતી રહી હતી. ત્યાર બાદ તે પૅસેજમાં સાઇકલ ચલાવવા માંડી હતી. દિંડોશી પોલીસ એ જાણવાનો પ્રયાસ કરી રહી છે કે તેણે આવું શા માટે કર્યું. પોલીસે તે છોકરી અને તેની મમ્મીને તાબામાં લઈને પૂછપરછ કરી હતી.