Maharashtra Monsoon Update: મહારાષ્ટ્રમાં દક્ષિણ-પશ્ચિમ ચોમાસાના સત્તાવાર આગમનની જાહેરાત થઈ હોવા છતાં રાજ્યમાં 15 જૂન સુધી વ્યાપક વરસાદની સંભાવના ઓછી હોવાનું મુખ્યમંત્રી Devendra Fadnavisએ જણાવ્યું છે.
દેવેન્દ્ર ફડણવીસ ફાઇલ તસવીર (સૌજન્ય: મિડ-ડે)
મહારાષ્ટ્રમાં દક્ષિણ-પશ્ચિમ ચોમાસાના સત્તાવાર આગમનની જાહેરાત થઈ હોવા છતાં રાજ્યમાં 15 જૂન સુધી વ્યાપક વરસાદની સંભાવના ઓછી હોવાનું મુખ્યમંત્રી Devendra Fadnavisએ જણાવ્યું છે. તેમણે રવિવારે સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે ચોમાસું રાજ્યના દક્ષિણ કોંકણ વિસ્તારમાં પ્રવેશી ચૂક્યું છે, પરંતુ આગામી દિવસોમાં વરસાદની તીવ્રતા અને ચોમાસાની આગળ વધવાની ગતિ ધીમી પડી શકે છે.
મુખ્યમંત્રીએ જણાવ્યું કે 9 જૂન સુધી સિંધુદુર્ગ અને રત્નાગિરીના કેટલાક વિસ્તારોમાં મધ્યમથી ભારે વરસાદની શક્યતા છે. જોકે, સમગ્ર મહારાષ્ટ્રમાં વ્યાપક વરસાદ થવાની શક્યતા હાલ ઓછી છે.
ADVERTISEMENT
તેમણે વધુમાં જણાવ્યું કે વિદર્ભ, મરાઠવાડા, ખાંડેશ અને મધ્ય મહારાષ્ટ્રના કેટલાક વિસ્તારોમાં વીજળીના કડાકા-ભડાકા અને તેજ પવન સાથે છૂટાછવાયા વરસાદી ઝાપટાં પડી શકે છે. પરંતુ આ વરસાદ મોટા પાયે ખેતીની વાવણી માટે પૂરતો નથી.
ખેડૂતોને વાવણીમાં ઉતાવળ ન કરવાની સલાહ
કૃષિ અને આપત્તિ વ્યવસ્થાપન વિભાગે ખેડૂતોને અપીલ કરી છે કે છૂટાછવાયા વરસાદને આધારે વાવણી શરૂ કરવાની ઉતાવળ ન કરે. વિભાગે જણાવ્યું કે આગામી દિવસોમાં વરસાદની સ્થિતિ પર નજર રાખીને જ ખેતી સંબંધિત નિર્ણયો લેવા જોઈએ.
સાથે જ નાગરિકોને વીજળીના કડાકા-ભડાકા દરમિયાન ઝાડ નીચે, ટીનના શેડ નીચે અથવા વીજ થાંભલા, ટ્રાન્સફોર્મર અને વીજ લાઈનોની નજીક આશરો ન લેવાની પણ સલાહ આપવામાં આવી છે.
અનેક જિલ્લાઓમાં યલો એલર્ટ જાહેર
ભારતીય હવામાન વિભાગ (IMD) એ રાયગઢ, રત્નાગીરી, સિંધુદુર્ગ, નાસિક, અહિલ્યાનગર, પુણે, કોલ્હાપુર, સતારા, સાંગલી, સોલાપુર, છત્રપતિ સંભાજીનગર, જાલના, પરભણી અને બીડ જિલ્લાઓ માટે યલો એલર્ટ જાહેર કર્યું છે.
આ વિસ્તારોમાં વીજળીના કડાકા-ભડાકા, મધ્યમ વરસાદ અને કલાકના 40થી 50 કિલોમીટર ઝડપે પવન ફૂંકાવાની શક્યતા વ્યક્ત કરવામાં આવી છે. જ્યારે ઠાણે, મુંબઈ, જલગાંવ, હિંગોલી અને નાંદેડ માટે હળવાથી મધ્યમ વરસાદ અને ગાજવીજની આગાહી કરવામાં આવી છે.
ચોમાસાના આગમન છતાં ગરમીનો પ્રકોપ યથાવત
ચોમાસું રાજ્યમાં પ્રવેશી ગયું હોવા છતાં મહારાષ્ટ્રના અનેક વિસ્તારોમાં ગરમીનો પ્રકોપ યથાવત છે. ઉત્તર મહારાષ્ટ્રમાં માલેગાંવે 42 ડિગ્રી સેલ્સિયસનું સર્વોચ્ચ તાપમાન નોંધાવ્યું હતું, જ્યારે જલગાંવમાં 41.6 ડિગ્રી સેલ્સિયસ તાપમાન નોંધાયું હતું.
અહિલ્યાનગરમાં 39 ડિગ્રી, છત્રપતિ સંભાજીનગરમાં 39.7 ડિગ્રી અને બીડમાં 39.2 ડિગ્રી સેલ્સિયસ તાપમાન નોંધાયું હતું. મરાઠવાડાના પરભણીમાં 38.5 ડિગ્રી અને ઉસ્માનાબાદમાં 37.1 ડિગ્રી સેલ્સિયસ તાપમાન રહ્યું હતું.
મુંબઈમાં ગરમી અને ભેજનું પ્રમાણ ઊંચું
મુંબઈમાં પણ ગરમી અને ભેજવાળું વાતાવરણ યથાવત રહ્યું હતું. શહેર વિસ્તારમાં મહત્તમ તાપમાન 36 ડિગ્રી સેલ્સિયસ અને ઉપનગરોમાં 35.5 ડિગ્રી સેલ્સિયસ નોંધાયું હતું.
કોંકણ પટ્ટીમાં તાપમાન પ્રમાણમાં ઓછું હોવા છતાં ભેજનું પ્રમાણ વધુ રહ્યું હતું. દહાણુમાં 38.1 ડિગ્રી, હરનાઈમાં 36.2 ડિગ્રી અને રત્નાગિરીમાં 33.9 ડિગ્રી સેલ્સિયસ તાપમાન નોંધાયું હતું.
મહાબળેશ્વર રાજ્યનું સૌથી ઠંડું સ્થળ
આ દરમિયાન મહાબળેશ્વરે રાજ્યમાં સૌથી ઓછું 29.3 ડિગ્રી સેલ્સિયસ તાપમાન નોંધાવીને ગરમીથી રાહત આપી હતી. હવામાન વિભાગના અવલોકન મુજબ દરિયાકાંઠાના વિસ્તારોમાં ભેજનું પ્રમાણ ઊંચું છે, જ્યારે આંતરિક વિસ્તારોમાં હજુ પણ ગરમ અને સૂકું વાતાવરણ જોવા મળી રહ્યું છે.
એકંદરે મહારાષ્ટ્રમાં હાલ ગરમી, ભેજ અને છૂટાછવાયા પ્રી-મોન્સૂન વરસાદનું મિશ્ર ચિત્ર જોવા મળી રહ્યું છે.
