ચાર દિવસમાં ૪૮ કરોડનો ગાંજો જપ્ત કર્યો, મુંબઈ કસ્ટમ્સ દ્વારા આઠની ધરપકડ

Mumbai Crime: મુંબઈ કસ્ટમ્સે છત્રપતિ શિવાજી મહારાજ આંતરરાષ્ટ્રીય એરપોર્ટ પરથી ૪૮ કરોડ રુપિયાની કિંમતનું ૪૮ કિલોથી વધુ હાઇડ્રોપોનિક ગાંજો જપ્ત કર્યો; ૮ લોકોની ધરપકડ કરાઈ; ચાર દિવસમાં મુંબઈ કસ્ટમ્સે કરી મોટી કાર્યવાહી

પ્રતીકાત્મક ફાઇલ તસવીર

મુંબઈ કસ્ટમ્સ (Mumbai Custom) એ ૧૮ થી ૨૨ ડિસેમ્બર દરમિયાન છત્રપતિ શિવાજી મહારાજ આંતરરાષ્ટ્રીય એરપોર્ટ (Chhatrapati Shivaji Maharaj International Airport) પર આઠ મુસાફરો પાસેથી ૪૮ કરોડ રૂપિયાની કિંમતનો ૪૮ કિલોથી વધુ હાઇડ્રોપોનિક ગાંજો જપ્ત કર્યો હતો. શેમ્પૂની બોટલો અને નાસ્તાના બોક્સમાં છુપાવેલો આ પ્રતિબંધિત માલ બેંગકોક અને મસ્કતથી આવતા મુસાફરો પાસેથી જપ્ત કરવામાં આવ્યો હતો. વધુમાં, એમ્ફેટામાઇન, હીરાના દાગીના, અર્ધ કિંમતી પથ્થરો અને વિદેશી ચલણ પણ જપ્ત કરવામાં આવ્યું હતું.

મુંબઈ કસ્ટમ્સે આંતરરાષ્ટ્રીય એરપોર્ટ પર આઠ મુસાફરો પાસેથી ૪૮ કરોડ રૂપિયાની કિંમતનો ૪૮ કિલોથી વધુ હાઇડ્રોપોનિક ગાંજો જપ્ત (Mumbai Crime) કર્યો છે, એમ મંગળવારે એક અધિકારીએ જણાવ્યું હતું.

ADVERTISEMENT

૧૮ થી ૨૨ ડિસેમ્બર દરમિયાન છત્રપતિ શિવાજી મહારાજ આંતરરાષ્ટ્રીય વિમાનમથક (Chhatrapati Shivaji Maharaj International Airport - CSMIA) પર કસ્ટમ્સ એરપોર્ટ કમિશનરેટની ટીમ દ્વારા હાથ ધરવામાં આવેલા ઓપરેશન દરમિયાન આ જપ્તી કરવામાં આવી હતી.

અધિકારીએ જણાવ્યું હતું કે, પ્રોફાઇલિંગ અને ગુપ્ત માહિતીના આધારે, અધિકારીઓએ બેંગકોક (Bangkok), થાઇલેન્ડ (Thailand) અને મસ્કત (Muscat), ઓમાન (Oman) થી આવતા મુસાફરોની અટકાયત કરી હતી અને અલગ અલગ જપ્તીઓમાં શેમ્પૂ બોટલ અને ટીન નાસ્તાના બોક્સમાં છુપાયેલો પ્રતિબંધિત માલ મળી આવ્યો હતો. બેંગકોકથી મુસાફરી કરી રહેલા પાંચ મુસાફરો પાસેથી કુલ ૩૫.૦૪૫ કિલો શંકાસ્પદ હાઇડ્રોપોનિક ગાંજો મળી આવ્યો હતો, જેની કિંમત ૩૫ કરોડ રૂપિયા છે.

મસ્કતથી આવેલા મુસાફર પાસેથી ૧૬ લાખનું ડ્રગ્સ જપ્ત

બીજા એક કેસમાં, ૧૮ ડિસેમ્બરે મસ્કતથી આવેલા એક મુસાફર પાસેથી ૧૬.૨ લાખ રૂપિયાની કિંમતનું ૮૧ ગ્રામ એમ્ફેટામાઇન જપ્ત કરવામાં આવ્યું હતું, અને બે અલગ અલગ કેસમાં બેંગકોકથી પરત ફરેલા બે મુસાફરો પાસેથી ૧૩.૦૦૩ કિલો હાઇડ્રોપોનિક ગાંજો, જેની કિંમત ૧૩ કરોડ રૂપિયા છે, તે જપ્ત કરવામાં આવ્યો હતો, એમ અધિકારીએ જણાવ્યું હતું.

અધિકારીએ વધુમાં ઉમેર્યું હતું કે, તમામ આરોપીઓની ધરપકડ કરવામાં આવી છે.

આ કાર્યવાહી દરમિયાન, કસ્ટમ ટીમે ૩૫.૧૮ લાખ રૂપિયાના ૨૮૩ ગ્રામ હીરાના દાગીના અને ૨૪.૯૧ લાખ રૂપિયાના ૬.૬ કિલો પોલિશ્ડ અર્ધ-કિંમતી પથ્થરો પણ જપ્ત કર્યા હતા.

અધિકારીએ જણાવ્યું હતું કે, ૨૨ ડિસેમ્બરે ફુજૈરાહ (Fujairah) જતા મુસાફરો પાસેથી ૪૫.૨૬ લાખ રૂપિયાનું વિદેશી ચલણ જપ્ત કરવામાં આવ્યું હતું.

આ મામલે વધુ તપાસ ચાલી રહી છે.

બાંગ્લાદેશી નાગરિકની સોના સાથે ધરપકડ

એક કિસ્સામાં, સ્પોટ ચેક અને એડવાન્સ્ડ પેસેન્જર ઇન્ફર્મેશન સિસ્ટમ (Advanced Passenger Information System - APIS) પ્રોફાઇલિંગના આધારે, માલે (Male) થી દુબઈ (Dubai) વાયા મુંબઈ (Mumbai) જઈ રહેલા એક બાંગ્લાદેશી નાગરિકની ધરપકડ કરવામાં આવી હતી. ગ્રાઉન્ડ હેન્ડલિંગ એજન્સી (BWFS) ના સ્ટાફ સભ્યને ૧,૪૬૦ ગ્રામ વજન અને ૧.૮૬ કરોડ રૂપિયાની કિંમતના ૨૪ કેરેટ સોનાના ડસ્ટના ચાર પેકેટ આપવા બદલ તેની ધરપકડ કરવામાં આવી હતી.