Mumbai Rains Today: આજે સવારથી શહેરમાં પડી રહેલા વરસાદના કારણે પૂર્વ, પશ્ચિમના ઉપનગરોમાં વાહન વ્યવહાર ધીમો પડ્યો છે; હાર્બર લાઇન પર લોકલ ટ્રેન સેવાઓ મોડી પડી; ઓછી વિઝિબિલિટીના કારણે હવાઈ સેવાઓ પ્રભાવિત થવાની શક્યતા; હવામાન વિભાગની સતત વરસાદની આગાહી
ફાઇલ તસવીર
આજે વહેલી સવારે મુંબઈ (Mumbai)ના વિવિધ ભાગોમાં ખાબકેલા ભારે વરસાદને (Mumbai Rains Today) કારણે શહેરના મુખ્ય માર્ગો પર ટ્રાફિક જામની સ્થિતિ સર્જાઈ હતી અને સબર્બન ટ્રેન સેવાઓ (Mumbai Local Train) ખોરવાઈ ગઈ હતી. પૂર્વ અને પશ્ચિમના ઉપનગરોમાં મુશળધાર વરસાદને કારણે નીચાણવાળા વિસ્તારોમાં પાણી ભરાઈ ગયા હતા, જ્યારે હાર્બર લાઇન પર સબર્બન રેલ સેવાઓ મોડી ચાલી રહી હતી. સતત ખરાબ હવામાનને ધ્યાનમાં રાખીને, સ્પાઇસજેટ (SpiceJet) એ છત્રપતિ શિવાજી મહારાજ ઇન્ટરનેશનલ એરપોર્ટ (Chhatrapati Shivaji Maharaj International Airport) પર ફ્લાઇટના સમયપત્રકમાં ફેરફાર અથવા વિલંબ થવાની શક્યતા અંગે મુસાફરો માટે એડવાઇઝરી જાહેર કરી હતી.
ઉપનગરોમાં વાહન વ્યવહાર ધીમો પડ્યો, પાણી ભરાવાના અહેવાલ
ADVERTISEMENT
પશ્ચિમ એક્સપ્રેસ હાઇવે (Western Express Highway) અને પૂર્વ એક્સપ્રેસ હાઇવે (Eastern Express Highway) સહિતના મુખ્ય માર્ગો પર પાણી ભરાવાને કારણે વાહનોની ગતિ ધીમી પડી જતાં સવારના સમયે નોકરી-ધંધે જનારા મુસાફરોને ભારે વિલંબનો સામનો કરવો પડ્યો હતો. વિઝિબિલિટી (દ્રશ્યતા) ઓછી થવા અને નીચાણવાળા વિસ્તારોમાં પાણી ભરાવાને કારણે પૂર્વ અને પશ્ચિમ ઉપનગરોના મુખ્ય જંકશનો પર ટ્રાફિક ધીમો પડી ગયો હતો.
પાણીના નિકાલ માટે અને ચોક થઈ ગયેલા ડ્રેનેજ ક્લિયર કરવા માટે મહાનગરપાલિકા (BMC)ના કર્મચારીઓને તૈનાત કરવામાં આવ્યા હતા. આ ઉપરાંત, સતત વરસાદથી (Mumbai Rains)સર્જાયેલી સમસ્યાને પહોંચી વળવા અને વાહનોને વૈકલ્પિક માર્ગો પર વાળવા માટે મુખ્ય ચાર રસ્તાઓ પર ટ્રાફિક પોલીસ (Mumbai Traffic Police) કર્મચારીઓ પણ હાજર રહ્યા હતા.
લોકલ ટ્રેનો મોડી પડી; હાર્બર લાઇન સૌથી વધુ પ્રભાવિત
સતત વરસાદને કારણે સિગ્નલ સિસ્ટમ અને ટ્રેક પર પાણી ભરાતાં મુંબઈના સબર્બન રેલ નેટવર્કને અસર પહોંચી હતી. છત્રપતિ શિવાજી મહારાજ ટર્મિનસ (CSMT) ને પનવેલ અને ગોરેગામ સાથે જોડતી હાર્બર લાઇન (Harbour Line local delayed) પર સવારના સમયે ટ્રેનો પોતાના નિર્ધારિત સમય કરતાં ૧૫ થી ૨૦ મિનિટ મોડી ચાલી રહી હોવાની ફરિયાદો મુસાફરોએ કરી હતી.
સેન્ટ્રલ રેલવે (Central Railway) અને વેસ્ટર્ન રેલવે (Western Railway) ની મુખ્ય લાઇન પર સેવાઓ ચાલુ રહી હતી, પરંતુ સુરક્ષાના ભાગરૂપે વરસાદથી અસરગ્રસ્ત વિસ્તારોમાં ટ્રેનો ધીમી ઝડપે ચલાવવામાં આવી રહી હતી. ટ્રેનો મોડી પડવાના કારણે સવારના પીક-અવર્સ દરમિયાન પ્લેટફોર્મ પર ભારે ભીડ જોવા મળી હતી.
હવામાન વિભાગ દ્વારા મધ્યમથી ભારે વરસાદની આગાહી
ભારતીય હવામાન વિભાગ (India Meteorological Department) એ આગામી ૨૪ કલાક દરમિયાન મુંબઈ શહેર અને ઉપનગરોમાં વાદળછાયા વાતાવરણ સાથે હળવાથી મધ્યમ વરસાદની આગાહી કરી છે. દરિયાકાંઠાના મહારાષ્ટ્રમાં મોન્સૂન સક્રિય હોવાથી કેટલાક ઉપનગરીય વિસ્તારોમાં પવનના ફૂંકાવ સાથે ભારે વરસાદના ઝાપટાં આવી શકે છે.
તમામ મ્યુનિસિપલ ઝોનમાં ઈમરજન્સી ટીમો એલર્ટ પર છે ત્યારે નાગરિક વહીવટીતંત્રે લોકોને પીક-અવર્સ દરમિયાન મુસાફરી કરતી વખતે સાવચેતી રાખવા અને રિયલ-ટાઇમ ટ્રાફિક અપડેટ્સ જોઈને જ બહાર નીકળવાની અપીલ કરી છે.
ખરાબ હવામાન વચ્ચે સ્પાઇસજેટ દ્વારા ફ્લાઇટ એડવાઇઝરી
#WeatherUpdate : Due to bad weather (heavy rain) in Mumbai (BOM), all departures/arrivals and their consequential flights might get affected. Passengers are requested to keep a check on their flight status via https://t.co/2wynECZugy.
— SpiceJet (@flyspicejet) August 11, 2026
ખરાબ હવામાનના કારણે હવાઈ મુસાફરી પર પણ અસર પડી હતી. સ્પાઇસજેટ (SpiceJet)એ મંગળવારે સવારે ૬:૩૨ વાગ્યે એક સત્તાવાર ટ્રાવેલ એડવાઇઝરી બહાર પાડીને મુસાફરોને જાણ કરી હતી કે ભારે વરસાદ અને ખરાબ હવામાનને કારણે મુંબઈ (BOM) થી આવતી-જતી તમામ ફ્લાઇટ્સના શેડ્યૂલ પ્રભાવિત થઈ શકે છે.
એરલાઇને છત્રપતિ શિવાજી મહારાજ ઇન્ટરનેશનલ એરપોર્ટથી મુસાફરી કરતા લોકોને વિનંતી કરી છે કે તેઓ એરપોર્ટ જતાં પહેલાં સત્તાવાર પોર્ટલ પર પોતાની ફ્લાઇટનું સ્ટેટસ તપાસી લે. એવિએશન સત્તાવાળાઓએ જણાવ્યું હતું કે એરપોર્ટ પર કામગીરી ચાલુ છે, પરંતુ ઓછી વિઝિબિલિટીના કારણે દિવસ દરમિયાન ફ્લાઇટ્સના ટેક-ઓફ અને લેન્ડિંગમાં વિલંબ થઈ શકે છે.
