મુંબઈ-અમદાવાદ હાઇવે પર રૉન્ગ સાઇડમાં આવેલી ટ્રકને કારણે થયેલા અકસ્માત પછી ટ્રાફિક-પોલીસે બોલાવ્યો સપાટો
પ્રતીકાત્મક તસવીર
પાલઘર નજીક મુંબઈ-અમદાવાદ હાઇવે પર રૉન્ગ સાઇડમાં ધસી આવેલી એક પિક-અપ ટ્રકને કારણે સર્જાયેલા ભયાનક અકસ્માતમાં ૧૩ લોકોએ જીવ ગુમાવ્યા બાદ મુંબઈની ટ્રાફિક-પોલીસ હરકતમાં આવી છે. ટ્રાફિક-પોલીસે શહેરમાં રૉન્ગ સાઇડ ડ્રાઇવિંગ કરનારાઓ અને પીક-અવર્સ દરમ્યાન પ્રતિબંધ હોવા છતાં રસ્તા પર દોડતાં ભારે વાહનો વિરુદ્ધ એક સપ્તાહની સઘન ઝુંબેશ શરૂ કરી છે. એ અંતર્ગત વિવિધ ઑનલાઇન કંપનીઓના ૨૫૦૦થી વધુ ડિલિવરી રાઇડર્સને ટ્રાફિકના નિયમોના ઉલ્લંઘન બદલ દંડ કરવામાં આવ્યો છે.
ફાસ્ટ ડિલિવરી પહોંચાડવાના ચક્કરમાં બાઇકચાલકો ટ્રાફિક-સિગ્નલ તોડવા અને શૉર્ટકટના ચક્કરમાં રૉન્ગ સાઇડમાં બાઇક ચલાવવા જેવા ગંભીર નિયમોના ભંગ બદલ પકડાયા હતા. મુંબઈમાં ટ્રાફિકની સમસ્યા અને અકસ્માતો નિવારવા માટે સવારે સાતથી ૧૧ અને સાંજે પાંચથી રાત્રે ૯ વાગ્યા સુધી ભારે વાહનોના પ્રવેશ પર પ્રતિબંધ છે. આ પ્રતિબંધિત કલાકો દરમ્યાન મુંબઈના રસ્તાઓ પર દોડતાં ૧૭૦ ભારે વાહનોને પણ દંડ ફટકારવામાં આવ્યો છે, જ્યારે નિયમોનું સરેઆમ ઉલ્લંઘન કરનારાં ૩૯ વાહનોને પોલીસે જપ્ત કર્યાં છે.
ADVERTISEMENT
ટ્રાફિક-પોલીસે સ્પષ્ટ કર્યું છે કે નિર્દોષ નાગરિકોનો જીવ જોખમમાં મૂકનારા આવા ડ્રાઇવરો સામે આગામી દિવસોમાં પણ આ ઝુંબેશ વધુ કડક બનાવવામાં આવશે.
પહેલી જાન્યુઆરીથી ૨૩ મે સુધીમાં રૉન્ગ સાઇડ વાહન ચલાવવા બદલ કુલ ૬૩૮૦ બાઇકરો સામે કાયદેસરની કાર્યવાહી કરવામાં આવી છે.
