નવી મુંબઈમાં પ્રેમસંબંધ તોડી નાખ્યો એટલે યુવકે યુવતી અને તેની બહેન પર બે રાઉન્ડ ફાયરિંગ કર્યું

ફરાર થઈ ગયેલા અન્ય આરોપીને ઝડપી લેવા માટે પોલીસટીમોને કામે લગાડવામાં આવી છે.

પ્રતીકાત્મક ફાઇલ તસવીર

નવી મુંબઈના કોપરખૈરણે વિસ્તારમાં પ્રેમસંબંધ તોડી નાખવાના મામલે ઉશ્કેરાયેલા એક યુવકે ૨૦ વર્ષની યુવતી અને તેની મોટી બહેન પર જાહેરમાં બે રાઉન્ડ ફાયરિંગ કર્યું હોવાની સનસનાટીભરી ઘટના સામે આવી છે. આ હુમલામાં બન્ને બહેનો ગંભીર રીતે ઘાયલ થઈ છે. પોલીસે ગુરુવારે રાત્રે બનેલી આ ઘટનાના ગણતરીના કલાકોમાં મુખ્ય આરોપીની ધરપકડ કરી લીધી છે, જ્યારે તેનો સાથી ફરાર થઈ ગયો છે.

પોલીસના જણાવ્યા અનુસાર મુખ્ય આરોપી તરીકે બાવીસ વર્ષના અર્જુન ચવાણની ધરપકડ કરવામાં આવી છે, જ્યારે તેનો સાથી રાકેશ ચવાણ નાસી છૂટવામાં સફળ રહ્યો હતો. યુવતીએ પ્રેમસંબંધ પર પૂર્ણવિરામ મૂકી દીધું હોવાથી અર્જુન ભારે રોષે ભરાયો હતો અને તેણે યુવતી તેમ જ તેની બાવીસ વર્ષની બહેન પર બે રાઉન્ડ ગોળીબાર કર્યો હતો. ગોળીબારમાં એક યુવતીને કાન પાસે અને બીજીને પીઠમાં ગોળી વાગી હતી. હુમલામાં લોહીલુહાણ થયેલી બન્ને બહેનોને તાત્કાલિક સારવાર માટે મ્યુનિસિપલ હૉસ્પિટલમાં ખસેડવામાં આવી હતી.

ADVERTISEMENT

પોલીસે આ સમગ્ર બનાવ વિશે ભારતીય ન્યાય સંહિતા (BNS) અને આર્મ્સ ઍક્ટ હેઠળ ગુનો નોંધીને તપાસ શરૂ કરી છે. ફરાર થઈ ગયેલા અન્ય આરોપીને ઝડપી લેવા માટે પોલીસટીમોને કામે લગાડવામાં આવી છે.