પાકિસ્તાન માટે કામ કરતી મહિલાના ચક્કરમાં ગદ્દારી કરી હોવાનો આરોપ
પ્રતીકાત્મક તસવીર
ઇન્ડિયન ઍર ફોર્સ (IAF)ના એક વિંગ કમાન્ડરની દિલ્હી પોલીસે સંરક્ષણ સંબંધિત સંવેદનશીલ માહિતી લીક કરવાના આરોપ બાદ ધરપકડ કરી છે. બે મહિના પહેલાં કસ્ટડીમાં લેવાયેલા આ અધિકારી પર ઑફિશ્યલ સીક્રેટ્સ ઍક્ટ હેઠળ કેસ દાખલ કરવામાં આવ્યો છે અને તે જુડિશ્યલ કસ્ટડીમાં છે. તપાસ-અધિકારીઓ માને છે કે વ્યૂહાત્મક લશ્કરી ગુપ્તચર માહિતીને લક્ષ્ય બનાવતું આ એક વિશાળ જાસૂસી નેટવર્ક હોઈ શકે છે. આ અધિકારી ફીલ્ડ યુનિટમાં ફરજ બજાવતો હતો. ૩૧ મેની રાત્રે આ અધિકારીની ધરપકડ કરવામાં આવી હતી.
પાકિસ્તાન માટે કામ કરતી મહિલાએ IAF અધિકારીનો સોશ્યલ મીડિયા પર સંપર્ક કર્યો હોવાની જાણકારી મળી રહી છે. આ મહિલા પાકિસ્તાની હૅન્ડલર્સના ઇશારે કામ કરી રહી હતી અને તેણે વિંગ કમાન્ડરનો વિશ્વાસ મેળવ્યો હતો અને તેમને એક ઍપ ડાઉનલોડ કરવા કહ્યું હતું. આ ઍપ ડેટાની ચોરી કરવા અને લોકેશન ટ્રૅક કરવા માટે રચાયેલા સ્પાયવેરનું એક સ્વરૂપ હતું.
ADVERTISEMENT
મહિલાએ લશ્કરી હિલચાલ, સૈનિકોની તહેનાતી, ફોટોગ્રાફ્સ, વિડિયો અને અન્ય સંવેદનશીલ સામગ્રી માગતાં પહેલાં ચૅટ અને વિડિયો-કૉલ દ્વારા સંપર્ક સ્થાપિત કર્યો હતો. તપાસ-અધિકારીઓનો આરોપ છે કે વિંગ કમાન્ડરે ડિજિટલ કમ્યુનિકેશન ચૅનલો દ્વારા તેની સાથે સંવેદનશીલ દસ્તાવેજો અને ડેટા શૅર કર્યા હતા.
